32:471  471  SERMON  SUR  LE  PSEAUME  CXXIV.  472  Voila  un  feu  ardant  de  leur  rage.  Voila  un  torrent  inpetueux,  pour  faire  un  deluge  pour  tout  destruire.  De  l'autre  coste,  regardons  s'ilz  ne  sont  point  semblables  a  des  chasseurs,  c'est  a  dire,  si  par  cautelles,  par  meschantes  pratiques  ilz  n'espient  point  tous  les  moyens  qu'il  leur  est  possible  de  nous  ruiner.  N'ont  ilz  pas  use  de  ce  mestier  par  cy  devant,  quand  nostre  Seigneur  ne  leur  a  point  permis  d'user  de  violence  a  l'encontre  des  fideles?  Car  a  la  verite  nous  avons  apperceu  en  cest  endroit  une  providence  miraculeuse  de  Dieu,  que  desia  par  long  espace  de  temps  il  les  a  pousse.  Comme  il  a  fait  anciennement  les  Madianites  a  s'entretuer,  et  s'encharner  l'un  contre  l'autre,  et  les  a  aveuglez  pour  convertir  leur  rage  contre  eux  mesmes.  Ilz  se  sont  entrebattus  iusqu'a  se  consumer.  Toutesfois  ce  pendant  a  belles  subtilitez  et  pratiques,  il  faut  aller  par  tel  moyen  en  cachette.  Brief,  ilz  n'ont  cesse  de  miner.  Comme  quand  on  ne  peut  appertement  entrer  en  une  ville  on  la  va  miner  par  dessoubz  terre.  Voila  comme  ilz  ont  tendu  leurs  filetz.  Et  maintenant  Dieu  sait  les  belles  intelligences  et  menees.  Car  ilz  ne  s'estoyent  pas  iettez  aux  champs  sans  avoir  fait  leurs  preparatifz.  Ainsi  l'Eglise  estoit  a,  un  doigt  des  filetz.  Ilz  pensoyent  estre  desia  venu  au  bout  de  leurs  entreprinses.  D'un  coste  la  guerre  ouverte:  de  l'autre  des  citations  pleines  de  fraude,  casser  et  rompre  sermens  publiques:  se  desborder  a  une  telle  deloyaute  que  c'est  horreur  d'y  penser.  Des  brigans  de  boys  auroyent  plus  de  honte  de  faulser  ainsi  leur  serment,  mesme  les  pratiques  voloyent  iusque  en  Italie.  Tout  cela  s'est  fait.  Considerons  donc  le  dangier  ou  nous  estions,  sinon  que  nostre  bon  Dieu  y  eust  proveu.  Cela  est  une  chose  bien  requise,  que  nous  cognoissions  le  dangier.  Car  si  nous  ne  pensons  au  mal  qui  nous  attouchoit,  nous  ne  serions  iamais  esmeuz  de  rendre  a.  Dieu  louange  d'un  tel  acte  que  nous  avons,  experimente.  Exemple:  voila  un  homme  qui  aura  une  petite  fievre,  le  medecin  luy  aura  ordonne  quelque  beuvrage  :  le  lendemain  il  sera  guery,  il  ne  fera  point  grand  estime  de  l'ayde  du  medecin.  Ou  pour  mieux  encore  aproprier  la  comparaison  a  nostre  propos,  celuy  qui  est  desbiffe  un  iour,  et  lendemain  il  a  bon  appetit,  il  ne  tient  pas  tel  compte  du  benefice  de  Dieu,  comme  pourra  faire  celuy  qui  aura  este  abbandonne  des  medecins,  qui  sera  venu  iusqu'au  bord  du  sepulcre.  Si  un  homme  passe  un  boys  dangereux  sans  mal  avoir,  ii  ne  cognoit  point  la  grace  que  Dieu  luy  fait,  mais  celuy  qui  sera  tombe  entre  les  brigans,  qui  a  desia  le  cousteau  sur  la  gorge,  si  nostre  Seigneur  luy  envoye  ayde,  il  a  bien  occasion  de  remercier  Dieu.  Pourtant  ce  n'est  point  sans  cause  que  le  Prophete  nous  admonneste  tant  de  regarder  le  dangier  ou  nous  estions,  veu  leurs  entrepinses,  leur  rage.