25:471  471  COMMENTARIUS  IN  IOSUE  CAP.  VII.  472  eventu  sentiat,  sceleratum  et  nefandum  fuisse  opus.  Nam  fundamenta  iacere  in  primogenito  tantundem  valet,  ac  filium  proiicere,  ut  obrutus  et  attritus  lapidum  mole  infeliciter  pereat.  Sic  portas  locare  in  minore  filio,  tantundem  valet  ac  aedificium  moliri  quod  non  nisi  filii  interitu  surgat.  Ita  in  sua  progenie  damnatur  qui  eo  vesaniae  prorumperet.  Nec  vero  Iosue  ex  proprio  sensu  hanc  maledictionem  protulit  :  sed  praeco  fuit  coelestis  vindictae.  Quo  magis  prodigiosum  est,  repertum  in  populo  Dei  fuisse  hominem  quem  formidabilis  ista  adiuratio  solennibus  verbis  concepta  a  sacrilega  temeritate  non  arceret:  sicuti  tempore  Achab  exortus  est  Hiel  civis  Bethel,  qui  Deum  quasi  ex  professo  hac  in  re  lacessere  ausus  est  (1.  Reg.  16,  34).  Verum  simul  testatur  sacra  historia,  non  irritum  fuisse  oraculum,  quod  Deus  pronunciaverat  in  manu  Iosue:  quia  in  Abiram  primogenito  novam  Iericho  fundavit,  et  in  Segub  filio  minore  erexit  portas  eius:  ut  in  sobolis  suae  exitio  agnosceret,  quid  sit  invito  et  repugnante  Deo  quidquam  tentare.  CAPUT  VII.  1.  Transgressi  autem  sunt  transgressione  filii  Israel  in  anathemate,  quia  Achan  filius  Charmi  filii  Zabdi,  filii  Zerah  de  tribu  Iehuda  abstulit  de  anathemate:  et  accensa  est  excandescentia  contra  filios  Israel.  2.  Porro  misit  Iosue  viros  e  Iericho  contra  Ai,  quae  erat  iuxta  Bethaven  ad  orientem  Bethel,  et  loquutus  est  cum  illis  dicendo:  Ascendite  et  explorate  terram.  Ascenderunt  itaque  viri,  et  exploraverunt  Ai.  3.  Qui  reversi  ad  Iosuam,  dixerunt  ei:  Ne  ascendat  totus  populus:  circiter  duo  millia  virorum  aut  circiter  tria  millia  virorum  ascendant,  et  percutient  Ai.  4.  Ascenderunt  ergo  illuc  e  populo  fere  tria  millia  virorum,  et  fugerunt  coram  viris  Ai.  5.  Percusseruntque  ex  eis  circiter  triginta  et  sex  viros,  et  persequuti  sunt  eos  a  porta  usque  ad  Sebarim,  et  percusserunt  eos  in  descensu:  atque  ita  liquefactum  est  cor  populi  fuitque  velut  aqua.  6.  Porro  Iosue  scidit  vestimenta  sua,  prociditque  in  faciem  suam  in  terram  coram  arca  Iehovae  usque  ad  vesperam,  ipse  et  seniores  Israel,  et  posuerunt  pulverem  super  caput  suum.  7.  Dixitque  Iosue:  Ah,  ah:  Dominator  Iehova,  ut  quid  traduxisti  populum  hunc  trans  Iordanem,  ut  traderes  nos  in  manum  Amorrhaei  qui  perdat  nos?  Atque  utinam  libuisset  nobis  manere  in  deserto  trans  Iordanem!  8.  O  Domine  quid  dicam  postquam  vertit  Israel  cervicem  coram  inimicis  suis?  9.  Audientque  Chananaeus  et  omnes  incolae  terrae,  et  vertent  se  contra  nos,  disperdentque  nomen  nostrum  e  terra:  quid  vero  facies  nomini  tuo  magno?