5:470  ac  praesertim  Augustae  fuisse  diu  cum  protestantibus  disputatum,  quid  eo  vanius  fingi  potest?  Quum  veteri  ecclesiae  consuetudine  fuerit  hoc  semper  observatum,  ut  si  qua  de  religione  controversia  exorta  esset,  sponte  protinus  susciperetur  a  sanctis  episcopis  cognitio,  nunquam  impetrare  licuit  protestantibus,  ut  vel  inchoaretur  secum  vera  aliqua  actio.  Augustae  sane  nihil  agi  coeptum  est,  prius  quam  ipsi  suam  confessionem  Caesari  exhibuissent.  Quod  ipsum  non  tandem  factum  est,  quemadmodum  hic  mentitur,  sed  primo  statim  initio  comitiorum,  triduo  enim  compositam  fuisse  constat.  At  vero  multis  post  eam  oblatam  diebus  lecta  est  demum  protestantibus  eius  confutatio  a  nonnullis,  ut  ferebatur,  theologis  consarcinata,  sed  lecta  modo,  exemplar  nullum-  concessum,  quum  id  magna  contentione  flagitarent.  Sic  cupidi  fuerunt  pontificii  suscipiendae  eius,  quam  iactant,  de  religione  tractationis.  Postea  datum  quidem  septenis  ab  utraque  parte  negotium  fuit,  ut  de  controversiis  inter  se  colloquerentur  ;  sed  vide  qua  aequitate:  diserte  enim  praefati  sunt  pontificii,  non  eo  animo  se  descendere  in  actionem,  ut  aliquid  in  melius  apud  se  restituerent,  sed  tantum  ut  protestantes  ad  se  reducerent.  Sic  disceptatio  vixdum  bene  tentata,  ut  inauspicata  erat,  mox  abrupta  fuit.  [fol.  7]  Quae  quidem  confessio  licet  in  multis  sit  reprehendenda,  nihilominus  nullo  modo  fuit  ab  eis  observata,  quemadmodum  in  multis  articulis  contrarium  fecerunt  et  faciunt.  Hoc  quoque  ex  eadem  officina  prodiit,  quod  protestantes  a  multis  articulis  confessionis  suae  discessisse  insimulat.  Quantum  ad  doctrinam  attinet,  quae  potissima  pars  est  et  fere  summa:  non  aliud  hodie  profitentur  aut  sustinent,  quam  tunc  prodiderunt.  Quidquid  illic  improbarunt,  hodieque  constanter  damnant  et  impugnant.  De  caeremoniis,  quae  non  a  Christo  et  apostolis  institutae,  sed  ab  aliis  autoribus  invectae,  et  ab  ecclesiis  pro  conditione  temporum  receptae  sunt,  ut  antea  testati  sunt  liberam  earum  esse  observationem,  quod  etiam  Augustinus  docet  ita  hanc  libertatem  ecclesiis  relinquendam  censent.  Nec  sane  quidquam  est  periculi,  si  ecclesiae  hac  parte  inter  se  varient,  nec  alia  praescribi  aut  varietatis  aut  similitudinis  regula  potest,  quam  ut  eum  in  ritibus  modum  sibi  statuat  quaeque  ecclesia,  quem  ad  aedificationem  facere  iudicabit.  Denique  quum  non  aliud  in  confessione  tradiderint,  quam  finem  rituum  omnium  esse  aedificationem,  ut  revera  nihil  sunt  aliud  nisi  fidei  exercitia:  in  eo  perstiterunt  hactenus  et  perstant,  ut  malae  fidei  eos  hic  accusare  nimiae  impudentiae  sit.  Multos  etiam  alios  articulos  in  illa  confessione  praeteritos  habent,  dissentientes  a  fide  catholica,  qui  etiam  quum  opus  erit  ostendi  poterunt.  30*