40:470  querimonias,  propheta  occurrit,  ipsos  fuisse  consumptos  igne  intestino,  hoc  est  cladem  ipsorum  non  posse  adscribi  Chaldaeis  victoribus,  sed  ipsis,  quia  sua  perfidia  rex  Zedechias  iterum  accendit  contra  se  regem  babylonium.  Poterat  enim  quietus  degere  in  suo  regno:  sed  non  temperavit  sibi  quin  iuguin  abiiceret.  Hac  igitur  de  causa  armavit  contra  se  regem  babylonium,  quod  esset  foedifragus.  Et  ita  propheta  non  abs  re  dicit  egressum  fuisse  ignem  e  virgula  una,  vel  ab  uno  surculo  ramorum  eius:  et  hinc  consumptum  fuisse  fructum  totius  vitis,  hoc  est,  quod  adhuc  restabat  fuisse  perditum  culpa  illius  regis  perfidi.  Iam  addit,  non  fuisse  sceptrum  ad  dominandum  inter  virgas.  Hinc  apparet,  expositionem  quam  attuli  optime  quadrare,  et  esse  prorsus  genuinam.  Dicebat  illic  virgas  fuisse  ad  sceptrum  dominantium:  hic  autem  dicit  non  fuisse  inter  virgas  illius  sceptrum  ad  dominandum.  Quod  postremo  sequitur  cras  expediemus.  Heri  tempus  non  permisit  exponere  verba  quae  sunt  in  fine  capitis  decimi  noni,  Lamentatio  haec,  et  erit  in  lamentationem.  Quidam  existimant  hoc  dici  de  populo  iudaico,  imo  de  toto  Israele,  quod  scilicet  futuri  sint  lamentabiles,  quia  Deus  non  desinet  in  ipsos  sua  iudicia  exercere,  donec  penitus  eos  consumpserit.  Sed  malo  referre  ad  prophetiam:  et  rectior  est  hic  sensus,  Lamentatio  haec,  ita  significat  propheta  vaticinium  hoc  triste  et  luctuosum  esse,  quia  continet  ultimam  cladem  populi.  Secundo  adiungit,  fore  in  lamentationem,  quia  suggeret  materiam  lugendi,  ut  solent  insignes  miseriae  magis  celebrari.  Si  quid  enim  usitatum  contingat,  paulo  post  effluit  ex  hominum  memoria.  Sed  si  qua  insignis  clades  et  memoratu  digna  contigerit,  vulgatur  passim,  imo  in  posterum  quoque  suppeditat  materiam  carminibus.  Significat  igitur  propheta  non  modo  vaticinium  hoc  esse  lugubre,  sed  fore  ut  vindicta  Dei  volitet  in  ore  omnium,  quia  erit  rarum  exemplum  et  memorabile.  Nunc  venio  ad  vigesimum  caput.  CAPUT  XX.  1.  Et  fuit  anno  septimo,  quinto  mense,  decimo  mensis  venerunt  viri  e  senioribus  Israel  ad  consulendum  Iehovam:  et  sederunt  coram  facie  mea  (vel  coram  me).  Hic  non  refert  visionem  aliquam,  sed  narrat  quod  re  ipsa  contigerat.  Est  igitur  simplex  narratio  historiae,  quod  ex  senioribus  Israel  quidam  fuerint  delecti  ad  ipsum  interrogandum.  Scimus  30*