32:470  moyennant  que  nous  soyons  son  peuple,  que  nous  cheminions  selon  sa  parolle.  Voila  l'instruction  qui  nous  est  donnee  par  David  en  ce  Pseaume,  suyvant  ce  qu'il  nous  enseigne.  Pour  le  premier.  Nous  voyons  comment  il  nous  admoneste  de  la  grandeur  du  peril  ou  nous  estions,  si  le  Seigneur  ne  nous  eust  ayde  au  besoing.  Pour  ce  faire  il  nous  represente  icy  la  fureur  des  enaemis  de  Dieu,  qui  sont  aussi  bien  les  nostres,  disant,  qu'ilz  sont  comme  des  gouffres:  et  que  incontinent  nous  eussions  este  engloutiz.  Ilz  sont  semblables  a  des  torrens  impetueux,  ou  comme  deluges  pour  tout  ravir.  Apres  qu'ils  sont  comme  bestes  sauvages,  qui  devorent.  Quartement,  il  les  accompare  aux  chasseurs,  qui  ne  vont  point  par  force  manifeste,  mais  par  cautelles.  Voila  les  quatre  comparaisons  que  nous  ameine  le  Prophete,  pour  nous  admonnester  en  quel  dangier  nous  sommes,  quand  nostre  Seigneur  ne  seroit  point  nostre  deffenseur  pour  nous  secourir  contre  noz  ennemis.  Premierement,  il  n'est  ia  mestier  de  plus  longuement  esplucher  quelle  est  la  cruaute  des  Papistes.  Car  nous  voyons  les  exemples  en  ce  qu'ilz  font,  autant  que  Dieu  leur  lasche  la  bride.  Quand  ilz  bruslent  noz  povres  freres,  qu'ilz  les  tourmentent,  qu'ilz  inventent  mesme  des  nouvelles  facons  de  cruaute,  qu'ilz  les  traittent  plus  inhumainement  que  les  meurtriers  et  brigans  :  iugeons  qu'ilz  nous  feroyent  a  nous  si  nostre  Seigneur  leur  donnoit  la  puissance.  Nous  voyons  bien  donc  que  c'est  un  feu  embrase  de  leur  rage,  laquelle  ilz  ont  conceue  contre  le  Regne  de  nostre  Seigneur.  Ce  seroit  sans  rien  espargner,  si  nostre  Seigneur  leur  avoit  permis  de  venir  a  bout  de  nous.  Considerons  aussi  si  nostre  Seigneur  ne  les  eut  tenus  serrez  depuis  l'espace  de  vingt  ans,  comme  on  enchaine  un  lion  en  une  eage  de  fer  :  s'il  ne  les  eust,  di  ie,  empeschez,  que  c'est  qu'ilz  eussent  fait  par  l'espace  de  25  ou  30  ans.  Ilz  n'ont  cesse  de  machiner  contre  Iesus  Christ  et  sa  doctrine,  iusqu'a  faire  conclusion  universelle  que  chascun  se  reduisist  soubz  la  tyrannie  du  Pape,  soubz  peine  d'estre  persecute  au  feu  et  a  l'espee,  declarant  a  tous  qui  ne  voudroyent  faire  cela,  qu'ilz  seroyent  ennemis  de  l'empire.  Quand  ilz  se  sont  declarez  avoir  un  tel  cueur,  et  n'ont  rien  execute  ayans  tous  les  moyens  en  main,  nous  pouvons  aysement  veoir  que  nostre  Seigneur  les  a  tenus  comme  on  feroit  un  demoniaque,  comme  a  la  verite  ilz  sont  possedez  du  diable,  qui  est  meurtrier  des  le  commencement.  Mais  que  voulons  nous  plus,  que  la  cruaute  qu'ilz  exercent  devant  noz  yeux  sur  noz  povres  freres?  Pour  cela,  comme  i'ay  desia  dit,  iugeons  si  nostre  Seigneur  leur  eust  donne  licence  de  faire  d'avantage:  que  c'est  qu'ilz  eussent  fait.  Voila  donc  des  loups  afamez,  des  lions  brnyans,  des  ours  qui  ont  des  pattes  pour  tout  dechirer.  30*