25:470  totius  familiae  ratio:  sed  quando  sponte  se  omnes  abdicant  a  pristino  statu,  salutem  quam  ipsis  stipulata  erat  Rahab,  promptitudine  obediendi  confirmant.  Porro  discamus  exemplo  Iosue,  quamvis  malitiose  et  data  opera  fidem  non  violemus,  non  tamen  id  ad  testandam  probitatem  sufficere,  nisi  sedulo  conemur  quam  dedimus  fidem  praestare.  Neque  enim  tantum  patitur  Rahab  a  suis  hospitibus  liberari:  sed  mature  cavet  ne  quid  iniuriae  in  primo  tumultu  sustineat:  et  quo  propensiores  sint  ad  officium,  admonet  interposito  iureiurando  ita  fuisse  pollicitos.  23.  Ingressi  itaque.  Haud  dubie  salvos  esse  Deus  voluit,  quorum  ita  flexit  animos  ad  amplexandam  liberationem.  Alioqui  eam  non  minus  superbe  nec  minore  ludibrio  quam  duo  generi  Loth  repudiassent.  Sed  longe  melius  etiamnum  illis  consulitur,  dum  reiecti  extra  castra,  severa  invitatione  ad  superioris  vitae  abnegationem  vocantur.  Nam  si  protinus  admissi  essent,  et  populo  indifferenter  permixti,  nunquam  illis  forte  venisset  in  mentem  sua  immundities,  atque  hoc  modo  in  ea  obtorpuissent.  Nunc  ubi  seorsum  locantur,  ne  gregem  sua  contagione  inficiant,  simul  incutitur  pudor,  qui  ad  seriam  conversionem  eos  sollicitet.  Neque  enim  convenit,  fuisse  quasi  in  tuto  sepositos,  ne  quis  in  turba  violenter  contra  eos  insurgeret:  quia  summo  omnium  favore  et  gratulatione  fuissent  excepti:  in  solitudine  autem  facilius,  et  quidem  impune,  offensi  fuissent.  Pristina  igitur  illis  immundities  ante  oculos  fuit  posita,  ne  polluti  temere  prorumperent  in  sanctum  coetum:  sed  potius  hoc  rudimento  assuefierent  ad  mutandum  vitae  genus.  Sequitur  enim  paulo  post,  habitasse  in  medio  populi:  nempe  quia  inquinamentis  purgati,  non  alio  loco  haberi  coeperunt,  quam  si  fuissent  oriundi  ex  genere  Abrahae.  Denique  significat,  ex  quo  professi  sunt  se  ante  fuisse  in  sordibus,  promiscue  cum  aliis  admissos.  Et  hac  cooptatione  Rahab  insignem  adepta  est  fidei  suae  fructum.  26.  Adiuravit  autem.  Ergo  consecratio  non  modo  in  unum  diem  valere  debuit,  sed  omnibus  saeculis  posteros  commonefacere,  urbem  illam  non  nisi  divinitus  fuisse  expugnatam.  Itaque  ruinas  et  vastitatem  loco  trophaei  in  perpetuum  monumentum  exstare  voluit:  quia  nova  structura  instar  liturae  futura  erat  ad  miraculum  delendum.  Ergo  ut  loci  deformitas  memoriam  potentiae  Dei  et  gratiae  ad  posteros  renovet,  dira  exsecratione  sancit  Iosue,  ne  quis  urbem  aedificet  semel  dirutam.  Colligimus  autem  ex  hoc  loco,  adminiculis  indigere  torporem  hominum,  ne  Dei  beneficia  obliviscendo  sepeliant.  Ideo  spectaculum  in  quo  conspicua  populo  fuit  Dei  virtus,  quasi  obliqua  fuit  ingratitudinis  exprobratio.  Imprecationis  vero  summa  est,  ut  si  quis  aggressus  unquam  fuerit  exstruere  Iericho,  infausto  et  lugubri  30*