45:47  47  HARMONIA  EVANGELICA.  48  dos  exseruit,  hinc  nefas  est,  ullo  modo  deflectere,  si  divinitus  servari  cupimus.  Observa  autem,  fidelibus  salutare  esse  cornu,  quod  impiis  terrificum  est.  ut  eos  dissipet  vel  prosternat  ac  conterat.  Davidem  servum  Dei  nominat,  non  simpliciter  quia  Deum  coluerit,  ut  unus  quilibet  piorum,  sed  alio  respectu,  quod  scilicet  delectus  fuerat  regendo  servandoque  populo  minister,  ut  Christi  personam  ac  vices  cum  suis  successoribus  gereret.  Etsi  autem  nullum  tunc  residuum  erat  apud  Iudaeos  regni  vestigium,  quia  tamen  in  Dei  promissiones  recumbit  Zacharias,  Davidem  vocare  Dei  ministrum  non  dubitat,  in  quo  Deus  specimen  ediderit  futurae  salutis.  Unde  sequitur,  tunc  nobis  Christum  re  ipsa  constitui  salutis  autorem,  dum  illi  inter  nos  solium  erigitur,  unde  nos  gubernet.  70.  Sicut  loquutus  est.  Ne  propter  novitatem  dubia  sit  salus,  quam  a  Christo  allatam  praedicat,  testes  eius  citat  omnes  prophetas,  qui  diversis  temporibus  excitati  uno  tamen  consensu  docent,  sperandam  a  solo  Christo  salutem  esse.  Neque  enim  tantum  Zachariae  consilium  est,  fidem  et  constantiam  Dei  laudare,  quia  praestet  atque  impleat  quod  olim  promisit,  sed  potius  ad  vetusta  oracula  revocare  voluit  fideles,  quo  certius  et  alacrius  amplecterentur  oblatam  sibi  salutem,  de  qua  omnes  ab  initio  testati  fuerant  prophetae.  Vere  enim  solida  fultura  stabilitur  nostra  in  Christum  fides,  quum  prophetarum  omnium  testimoniis  ornatus  in  lucem  prodit.  Sanctos  vocat  prophetas,  quo  plus  autoritatis  et  reverentiae  habeant  eorum  verba,  ac  si  diceret,  non  leves,  aut  gregarios,  sed  classicos  esse  testes,  imo  publico  mandato  instructos,  ut  qui  divinitus  in  hunc  finem  a  vulgo  hominum  segregati  fuerint.  Quomodo  autem  singuli  prophetae  testimonium  reddiderint  Christo,  minutis  partibus  disserere  nimis  longum  esset.  Hoc  in  praesentia  sufficiat,  quum  omnibus  solenne  sit,  non  aliter  spem  facere  populo,  quod  Deum  habiturus  propitium  esset,  nisi  proposito  in  medium  foedere,  quod  in  Christo  fundatum  erat,  diserte  satis  de  futura  redemptione  loqui,  qualis  in  Christo  patefacta  est.  Huc  accedunt  multi  illustres  loci,  ubi  non  obscure  de  Christo  vaticinantur,  sed  eum  quasi  digito  monstrant.  Praecipue  tamen  tenenda  est  illa  divini  foederis  subscriptio,  quam  si  quis  negligat,  nihil  unquam  in  prophetis  intelliget:  quemadmodum  Iudaei  misere  vagantur  in  scriptura  legenda,  quia  in  verbis  tantum  curiosi  a  scopo  illo  aberrant.  71.  Salutem  ex  inimicis.  Clarius  virtutem  et  officium  Christi  explicat  Zacharias.  Et  certe  parum  vel  nihil  prodesset,  audire  datum  esse  nobis  Christum,  nisi  etiam  sciremus,  quid  nobis  conferat.  Hac  ergo  de  causa  plenius  docet,  quorsum  erectum  sit  salutis  cornu  :  nempe  ut  salvi  sint  fideles  ab  hostibus  suis.  Minime  autem  dubium  est,  quin  satis