24:47  47  COMMENTARIUS  IN  EXODI  CAP.  UL  48  vasa  argentea  et  vasa  aurea,  et  vestes:  quae  imponetis  filiis  vestris  et  filiabus  vestris:  et  spoliabitis  Aegyptum.  18.  Et  postquam  audierint  vocem.  Ad  verbum  est,  audient  vocem  tuam  :  quod  ita  multi  accipiunt  ac  si  Deus  obsequentes  fore  promitteret.  Sed  prior  sensus  videtur  melius  quadrare,  ut  priore  loco  iubeat  doceri  voce  Mosis,  deinde  comites  se  adiungere  ad  exponendum  Pharaoni  mandatum.  Antequam  enim  illis  iniungeretur  tam  difficile  negotium,  operaepretium  fuit  Dei  autoritatem  illis  proponi,  ne  illud  susciperent  vacillantibus  animis.  Summa  autem  mandati  est,  ut  petant  a  Pharaone  commeatum  sacrificandi  causa.  Porro  ne  temerario  impulsu  putentur  id  facere,  iubentur  ita  praefari,  Deum  sibi  venisse  obviam,  idque  iussisse.  Nam  occurrendi  verbum  tantundem  valet  ac  sponte  se  offerre.  Ingemuerant  quidem  prius,  et  saepius  imploraverant  fidem  et  misericordiam  Dei:  vere  tamen  hic  fuit  voluntarius  occursus,  quum  praeter  spem  omnium  se  liberatorem  fore  professus  est.  Diximus  enim  clamasse  impetu  doloris  magis  quam  exorandi  fiducia.  Iam  suggeritur  illis  praetextus,  quo  suspicionem  et  invidiam  a  se  avertant.  Neque  enim  liberi  discessus,  unde  gravis  iactura  instabat  tyranno,  unquam  permissa  fuisset  facultas.  Adde  quod  tam  aequum  postulatum  negando,  regio  iure  imperioque  se  privavit,  quum  Deo  summo  regi  suum  honorem  eriperet.  Etsi  enim  sub  eius  ditione  erant  Israelitae,  non  tamen  hac  lege  in  eos  dominabatur  ut  Deum  iusto  cultu  fraudaret.  Atqui  utile  fuit  nonnisi  optima  de  causa  populum  invito  rege  egredi,  ne  in  futurum  tempus  daretur  subditis  quibuslibet  excutiendi  iugi  libertas.  Aliud  quidem  suspicatus  est  Pharao,  nempe  meram  esse  fallaciam  quod  de  sacrificio  obtendebant:  qui  tamen  diffidentia  haec  ex  tyrannide  oriebatur:  satis  in  eo  convicta  fuit  eius  ingratitudo,  quod  sibi  male  conscius  Deum  coli  vetuit.  Iam  quidquid  illi  in  mentem  venerit,  miraculis  tamen  quae  verbo  addita  erant  edoctus,  ignorare  non  debuit  a  Deo  profectam  esse  hanc  legationem.  Si  tantum  loquuti  essent  Israelitae,  nec  interposita  fuisset  ulla  sermonis  comprobatio,  merito  forsan  sibi  a  fraude  cavisset:  verum  ubi  palam  ostendit  Deus  se  huius  profectionis  esse  autorem,  seque  extra  Aegypti  fines  sacrificium  exigere,  cessat  omnis  excusationis  color,  atque  ita  purgatur  a  calumnia  populi  discessio.  Si  quis  obiiciat,  alienum  fuisse  a  Dei  natura  astute  quidquam  obtendere,  facilis  est  responsio,  Deum  nulla  fuisse  necessitate  obstrictum  ut  tyranno  consilium  suum  patefaceret.  Speciem  mendacii  his  verbis  fuisse  inclusam  falso  quidam  iactant.  Nihil  enim  simulare  populum  suum  voluit  Deus,  tantum  (quod  iure  suo  poterat)  tyrannum  celavit  quid  ultra  fac-