8:468  queant  suis  fallaciis,  pacem  conturbant  ecclesiae,  et  pietatis  consensum  scindunt  ac  lacerant.  Quas  tamen  obtendant  rationes  imperiti  sed  non  mali  homines,  quibus  tanto  sceleri  danda  videtur  impunitas,  breviter  videndum  est.  Regnum  suum,  inquiunt,  manu  et  armis  constitui  Dominus  non  voluit,  sed  spirituali  evangelii  gladio:  et  suos  hortatus  est,  ut  parati  essent  proprium  sanguinem  fundere:  ut  alienum  funderent,  nusquam  praecepit:  apostolos  tanquam  agnos  in  medium  luporum  emisit,  non  instruxit  carnis  potentia.  Atqui  si  contra  excipiam,  nusquam  Dommum  suis  mandasse  ut  furta,  rapinas,  adulteria,  caedes,  veneficia  puniant,  ideoque  impune  ferenda  esse  haec  omnia,  quid  dicturi  sunt?  Concedentne  laxandas  esse  habenas  sceleratis,  ac  non  potius  dicent,  non  obstare,  quae  singulis  praecipitur,  tolerantiam,  quominus  vigeant  legum  sanctiones?  Verum  quidem  esse  fateor,  neque  vi  armata  erectum  ab  initio  fuisse  Christi  regnum,  neque  armorum  praesidio  stare.  Evangelii  enim  praedicatione  regnare  Christum  oportet,  ut  impleatur  [pag.  18]  vaticinium  illud:  Populus  quem  non  noveram  mihi  subiectus  fuit,  ad  auditum  auris  obedivit  mihi  (Psal.  18,  45).  Itaque  Dominus,  quo  illustrior  esset  vocis  suae  efficacia,  nudos  et  inermes  misit  apostolos:  nec  modo  destitui  voluit  terrena  potentia,  sed  totum  fere  mundum  habere  infestum,  ut  coelestem  esse  evangelii  victoriam  omnibus  constaret,  dum  instar  palmae  contra  tot  tamque  ardua  obstacula  emersit.  Nec  vero  aliter  hac  aetate  quam  invito  et  reluctante  mundo  vel  denuo  surrexit  vel  adhuc  floret.  Sua  igitur  virtute,  non  hominum  manu  sustinetur  religio.  Nec  frustra  evangelii  ministros  patientia  magis  armat  Christus,  quam  bellandi  facultate:  quia  sic  animatos  esse  convenit,  ut  quam  lingua  asserunt  doctrinam,  proprio  sanguine,  quoties  opus  fuerit,  obsignare  non  dubitent.  Primum  verae  sanaeque  doctrinae  plerumque  adversantur  mundi  principes.  Deinde  multos,  quibus  ad  breve  tempus  arrisit,  suo  rigore  exasperat.  Pauci  sunt  qui  ferendo  iugo  cervicem  libenter  submittant:  et  quemadmodum  delitias  sibi  ipsi  faciunt,  ita  doctores  appetunt  blandos  et  mellitos,  qui  serviliter  adulentur.  Iam  videmus  quam  non  aequalis  sit  principum  successio,  sed  bene  compositum  a  patre  ecclesiae  statum  filius  quasi  violenta  procella  repente  subvertat.  Atqui  evangelii  ministros  minime  ad  quamlibet  auram  flexibiles  nutare  decet:  verum  quocunque  inclinent  hominum  animi,  et  quamlibet  dissimilis  sit  temporum  conditio,  rectum  cursum  tenere,  ne  aeterna  et  immutabilis  Dei  veritas,  quae  apud  eos  deposita  est,  perfida  eorum  ignavia  concidat.  Sic  veteres  prophetas,  licet  propitiis  interdum  regibus  usi  sint,  eorumque  praesidio  [pag.  19]  adiuti,  videmus  tamen  variis  subinde  tempestatibus  fuisse  iac-