47:468  Ainsi  donc  nous  voyons  maintenant  quelle  difference  il  y  a  entre  l'Evangile  de  sainct  Iehan  et  les  autres  trois:  tellement  qu'a  bien  dire,  l'Evangile  de  sainct  Iehan  nous  est  comme  la  clef  pour  nous  donner  entree  et  ouverture  aux  autres.  Car  si  nous  lisons  sainct  Matthieu,  sainct  Marc  et  sainct  Luc,  nous  ne  cognoistrons  pas  si  bien  pourquoy  c'est  que  Iesus  Christ  a  este  envoye  au  monde,  comme  quand  nous  aurons  leu  sainct  Iehan.  Ayans  leu  sainct  Iehan,  nous  cognoistrons  puis  apres  de  quoy  nous  sert  ce  que  nostre  Seigneur  Iesus  Christ  a  fait,  et  ce  qu'il  a  prins  chair  humaine,  qu'il  est  mort  et  ressuscite:  nous  cognoistrons,  di-ie,  quelle  est  la  fin  et  la  substance  de  toutes  ces  choses,  en  lisant  cest  Evangile.  Et  voyla  pourquoy  il  ne  s'arreste  point  tant  a  l'histoire:  comme  nous  verrons  par  l'ordre  qu'il  tiendra  ci  apres.  Il  est  vray  que  ces  choses  meritent  bien  d'estre  deduites  plus  au  long:  mais  pour  ce  qu'il  y  a  grande  substance  au  texte  que  nous  avons  a  exposer,  ie  touche  les  choses  en  brief,  le  plus  que  ie  puis.  Contentons  nous  donc  de  ce  que  nous  avons  touche  en  somme  de  l'office  de  Iesus  Christ,  ascavoir  que  sainct  Iehan  nous  declare  comme  il  a  este  envoye  de  Dieu  son  Pere  afin  de  parfaire  le  salut  des  hommes.  Il  declare  comme  il  a  prins  chair  humaine,  comme  il  est  mort  et  ressuscite,  qu'il  est  le  gage  de  l'amour  de  Dieu,  qu'il  est  l'ame  de  nostre  redemption,  et  qu'en  luy  les  promesses  de  Dieu  sont  ratifiees.  Au  reste  il  nous  faut  noter  (comme  i'ay  desia  dit)  que  sainct  Iehan  touche  les  choses  plus  briefvement  que  ne  font  pas  les  trois  autres:  mais  il  s'arreste  le  plus  a  la  substance,  c'est  a  dire  nous  monstrer  quelle  est  la  doctrine  de  Iesus  Christ,  quelle  charge  luy  a  este  commise  de  Dieu  son  Pere:  brief  quelle  est  sa  vertu,  sa  puissance  et  sa  bonte  envers  nous.  Quant  a  la  signification  du  mot  en  soy,  VEvangile  est  a  dire  une  bonne  nouvelle:  mais  ce  mot  nous  doit  estre  comme  sacre,  afin  de  nous  faire  hayr  les  choses  de  ce  monde  et  afin  que  nous  cognoissions  que  tout  nostre  bien,  et  nostre  felicite,  ioye  et  gloire  est  en  Iesus  Christ.  Quand  donc  nous  prononcerons  ce  mot  Evangile  qui  est  a  dire  Bonne  nouvelle,  que  nous  apprenions  de  ne  nous  point  resiouir  outre  mesure  es  choses  de  ce  monde,  qui  sont  caduques  et  vaines.  Ne  nous  reiouissons  point  en  delices,  en  voluptez,  ni  en  rien  qui  soit:  mais  esiouissons  nous  en  ce  que  Iesus  Christ  nous  a  este  envoye:  que  Dieu  s'est  donne  a  nous  en  sa  personne:  que  Iesus  Christ  est  venu  afin  d'estre  nostre  reconciliation  entre  Dieu  et  nous:  que  Dieu  nous  accepte  pour  ses  enfans,  a  ce  que  nous  ne  soyons  perdus  et  damnez.  Voyla  comme  ce  mot  doit  nous  estre  sacre,  afin  de  nous  faire  priser  ce  bien  inestimable  qui  nous  a  este  apporte  par  nostre  Seigneur  Iesus  Christ.