40:468  exposui  consilium  prophetae.  Quia  enim  obstupuerant  Iudaei  in  suis  malis,  neque  subacti  fuerant,  ut  suppliciter  confugerent  ad  Dei  misericordiam,  propheta  illum  torporem  corrigit,  quum  ostendit  quale  fuerit  ipsorum  principium.  Nunc  dicit  redactos  fuisse  usque  ad  extremas  miserias,  idque  quasi  subito  impetu.  Nam  mutatio  quae  contigit  intra  exiguum  tempus  debuit  ipsos  magis  ad  vivum  afficere.  Si  paulatim  fuissent  imminuti,  non  fuisset  mutatio  tam  notabilis.  Sed  ubi  quasi  fulmine  fuit  percussa  haec  vitis,  fuit  evulsa,  arefacta,  combusta:  illa  momentanea  clades,  ut  iam  dixi,  ostendit  non  fuisse  fortuito  illud  factum,  sed  manifesta  Dei  iracundia.  Hac  ratione  dicit  violenter  evulsam  fuisse  vitem,  et  proiectam  in  terra.  Si  paulatim  siccata  fuisset  vitis,  non  fuisset  adeo  mirum:  sed  evulsio  tam  subita  debuit  ipsos  commonefacere  de  maledictione  Dei,  ad  quam  obtorpuerant.  Haec  ratio  est  cur  propheta  plures  similitudines  simul  accumulet.  Poterat  sufficere  evulsio:  sed  addit  proiectam  fuisse  in  terra,  nempe  ut  prorsus  exaresceret.  Adiungit  ventum  orientalem,  qui  corrumpit  tam  fruges  quam  arbores,  ut  satis  patet  ex  pluribus  locis:  neque  id  solum,  sed  dicit  confractos  fuisse  ramos,  vel  discerptos  et  arefactos:  postremo  consumptos  fuisse  igne.  In  summa,  apparuit  quasi  visibilis  Dei  manus  in  illa  horribili  clade  populi,  quod  simul  et  evulsus  et  discerptus  fuerit,  et  arefactus  et  exustus.  Sequitur,  13.  JEt  nunc  plantata  est  in  deserto,  in  terra  siccitatis  et  sitis  (hoc  est,  arida  et  siticulosa).  Videtur  propheta  secum  pugnare,  quia  aperte  inter  se  dissident  haec  membra,  vitem  fuisse  non  modo  arefactam,  sed  igne  consumptam:  deinde  plantatam  in  loco  deserto.  Si  enim  exaruerat,  non  potuit  iterum  colligere  radicem:  sed  incendium  magis  etiamnum  spem  omnem  abstulerat.  Si  ergo  sarmenta  in  cineres  redacta  erant,  quis  unquam  videt  vitem  oriri  et  crescere  ex  cineribus?  Sed  quum  dixit  propheta  vitem  fuisse  arefaciam  et  exustam,  respexit  quid  ex  ruina  qua  semel  pessumdata  urbs  fuerat  homines  sensu  suo  possent  comprehendere.  Nam  fuit  certe  horribile  illud  spectaculum,  ubi  rege  capto  tributarius  factus  est  populus,  templum  expilatum,  urbs  direpta,  et  eorum  incolumitas  a  libidine  victoris  penderet.  Quum  ergo  neque  ulla  dignitas,  neque  regium  nomen,  neque  libera  et  secura  vitae  conditio  maneret:  praesertim  vero,  quia  prope  ad  carnificinam  adducti  erant,  nonne  haec  ruina  prorsus  similis  fuit  incendio?  Nunc  ergo  videmus  cur  propheta  dixerit  vitem  fuisse  evulsam  et  combustam,  nempe  respectu  gravissimae  illius  cladis,  quae  spem  omnem  restitutionis  ad  breve  tempus  abstulerat.  Loquutus  est