47:467  467  CONGREGATION  468  qui  avoit  este  promis  de  tout  temps:  mais  tant  y  a  que  les  Epistres  de  sainct  Paul  ne  sont  point  nommees  Evangile.  Et  pourquoy?  D'autant  que  la  nous  n'avons  point  une  histoire  continuelle  qui  nous  monstre  comme  Dieu  a  envoye  son  Fils,  comme  il  a  voulu  qu'en  vestant  nostre  nature  il  ait  eu  une  vraye  fraternite  avec  nous:  comme  il  est  mort,  ressuscite,  et  monte  aux  cieux:  cela,  di-ie,  n'est  point  deduit  d'un  fil  continuel  en  sainct  Paul.  Il  est  bien  certain  que  la  doctrine  qui  est  contenue  en  ses  Epistres,  est  conforme  a  la  doctrine  de  l'Evangile:  mais  tant  y  a  que  ce  mot  est  attribue  par  especial  a  ces  quatre  histoires,  pour  la  raison  que  i'ay  desia  alleguee.  Or  quand  nous  disons  que  la  substance  de  l'Evangile  est  comprinse  en  la  personne  du  Fils  de  Dieu,  cela  n'est  point  seulement  pour  dire  que  Iesus  Christ  est  venu  au  monde,  mais  que  nous  scachions  aussi  quel  est  son  office,  quelle  charge  luy  a  este  commise  de  Dieu  son  Pere,  et  quelle  est  sa  vertu.  Ce  qu'il  nous  faut  bien  noter:  car  de  la  nous  pourrons  recueillir  la  difference  d'entre  l'Evangile  de  S.  Iehan  et  les  trois  autres.  Les  quatre  Evangelistes  sont  bien  conformes  en  cela,  qu'ils  nous  annoncent  comme  le  Fils  de  Dieu  est  apparu  au  monde,  qu'il  a  este  fait  vray  homme,  semblable  a  nous  en  toutes  choses  excepte  peche.  Apres  ils  nous  annoncent  comme  il  est  mort,  ressuscite  et  monte  aux  cieux:  brief,  tout  ce  qui  luy  a  este  commis  pour  nous  attirer  a  Dieu  son  Pere,  est  la  declare.  Mais  il  y  a  deux  choses  qui  sont  particulieres  a  sainct  Iehan:  l'une  est  qu'il  s'arreste  plus  a  la  doctrine  de  Iesus  Christ  que  ne  font  pas  les  autres.  Item  qu'il  nous  declare  d'une  vivacite  plus  grande,  sa  vertu  et  sa  puissance.  Il  est  vray  que  les  autres  parlent  bien  de  la  doctrine  de  Iesus  Christ,  mais  c'est  plus  en  brief:  il  n'y  en  a  que  quelques  petits  sommaires  et  sainct  Iehan  nous  en  fait  une  longue  declaration,  comme  nous  voyons  au  sixieme  chapitre,  la  ou  il  est  parle  de  ce  miracle  qu'il  fait  au  desert,  quand  il  repeut  une  telle  multitude.  Car  sur  cela  sainct  Iehan  vient  a  entrer  en  propos,  comme  Iesus  Christ  est  le  pain  de  vie  eternelle.  Nous  voyons  donc  ceste  doctrine  de  Iesus  Christ  qui  a  este  declaree  au  long  par  sainct  Iehan,  et  avec  une  plus  grande  deduction  qu'elle  n'est  pas  par  les  autres  Evangelistes:  et  mesmes  qu'elle  a  este  omise  par  eux.  Autant  en  est-il  du  reste:  car  depuis  qu'il  a  touche  quelques  miracles  et  histoires,  il  revient  tousiours  a  la  doctrine,  et  prend  occasion  d'entrer  en  matiere  pour  traitter  de  la  vertu  de  nostre  Seigneur  Iesus  Christ:  comme  depuis  le  douzieme  chapitre  iusques  a  l'histoire  de  la  passion,  il  ne  traitte  que  de  ceste  doctrine-la.