40:466  iectum  in  carcerem.  Ostendit  igitur  quam  severe  Deus  punierit  obstinatam  malitiam  illius  gentis.  Nam  quia  castigatus  fuerat  rex  Ioachas  debuit  hoc  valere  ad  correctionem.  Quum  ergo  nihilo  melior  redditus  esset  populus,  severitas  duplicata  fuit:  et  ideo  exprimit  Ezechiel  fuisse  coniectum  regem  Ioachim  in  munitiones.  Addit,  ne  audiatur  amplius  vox,  hoc  est,  rugitus  eius  in  montibus  Israel.  Tametsi  enim  redactus  fuerat  in  angustias,  quia  accisum  fuerat  magna  ex  parte  eius  regnum,  non  tamen  destiterat  ferocire.  Hanc  igitur  eius  insolentiam  propheta  acriter  deridet,  quod  non  desineret  clamare  et  rugire  etiam  in  montibus  Israel.  Sequitur,  10.  Mater  tua  tanquam  vitis  in  sanguine  tuo  super  aquas  plantata  fuit:  fructifera  et  ramosa  (vel  frondosa,  ut  alii  vertunt)  fuit  ob  aquas  multas.  11.  Et  fuerunt  illi  virgae  roboris  (id  est,  robustae,  vel  fortes)  ad  sceptra  dominantium:  et  elevata  fuit  statura  eius  supra  (id  est,  superne  inter  ramos,  hoc  est,  inter  palmites)  et  apparuit  in  altitudine  sua,  in  multitudine  ramorum  suorum.  12.  Et  evulsa  fuit  in  furore  (aut  excandescentia)  in  terram  proiecta:  et  ventus  orientalis  arefecit  fructum  eius,  discerpti  sunt  (vel  confracti),  et  arefacti:  virga  robusta  (virgae  eius  fuerunt  confractae  et  arefactae),  ignis  voravit  eas.  Hic  Ezechiel  duplicem  statum  ponit  Iudaeis  ante  oculos,  ut  agnoscant  se  recidisse  in  extremas  miserias,  quia  Deum  provocaverint.  Neque  enim  satis  reputabant  praesentem  suum  statum,  nisi  in  memoriam  reducta  fuisset  pristina  dignitas  et  felicitas,  qua  fuerant  ornati.  Nam  quodammodo  occalluerant  ad  omnia  mala:  quamvis  sola  fere  Hierosolyma  restaret  incolumis,  non  tamen  remiserant  animos,  sed  perinde  lasciviebant  atque  rebus  integris.  Quia  ergo  nondum  fuerant  humiliati  tot  cladibus,  ideo  propheta  ab  una  parte  demonstrat  qualis  fuerit  prima  eorum  conditio:  deinde  admonet  quorsum  reciderint.  Haec  igitur  comparatio  debuit  acrius  pungere  ipsorum  animos,  ut  tandem  sentirent  Deum  sibi  esse  infestum.  Nunc  tenemus  consilium  prophetae  cur  dicat  matrem  populi  initio  fuisse  quasi  vitem  frondosam  et  fructiferam.  Quod  vitem  dicit  fuisse  plantatam  iuxta  aquas,  non  mirum  est.  Neque  enim  illic  vites  requirunt  loca  excelsa  et  arida,  ut  in  frigidis  regionibus:  sed  potius  succum  expetunt  ab  aquis,  ut  colligitur  ex  pluribus  testimoniis  scripturae.  Dicit  ergo  propheta  populum  initio  fuisse  instar  vitis  quae  in  regione  amoena  et  optabili  plantata  erat.  Dicit  vitem  illam  fuisse  frondosam,  vel  ramosam,  et  fructiferam,  nempe  quia  succum  et  humorem  trahebat  ab  aquis.  Quantum  ad  nomen  sanguinis  spectat,  falluntur  meo  iudicio,  qui  accipiunt  pro  vigore.  Potius  metaphorice  sumi-  30