25:466  1.  Iericho  erat  clausa.  Dicit  Iericho  fuisse  clausam,  quia  non  aperiebantur  portae  :  sicut  belli  tempore  custodiuntur  urbes  diligentius  solito.  Addit  vehementiae  causa,  portas  fuisse  obseratas,  quasi  diceret,  attentos  ad  custodiam  fuisse  incolas,  ne  incauti  opprimerentur.  Ita  eius  potiundae  non  alia  spes,  nisi  vi  et  manu  expugnaretur,  quia  per  insidias  capi  non  potuit.  Hoc  ad  gratiam  Dei  illustrandam  valet,  quia  longa  et  molesta  obsidio  fatigasset  filios  Israel,  nisi  mature  oblatum  fuisset  e  coelo  remedium.  Interea  periculum  erat,  ne  in  angulum  coacti  inedia  et  fame  consumerentur  :  quia  in  regione  infesta  nulla  erat  pabulandi  facultas.  Deus  ergo  ne  ad  urbem  unam  desideant,  insolito  miraculo  succurrit:  ac  muris  quidem  eversis  ingressum  illis  patefecit,  quo  deinde  confidentius  alias  urbes  invaderent  Nunc  videmus  quomodo  inter  se  cohaereant  duo  primi  versus:  Iericho  fuisse  clausam,  et  ita  filios  Israel  fuisse  ab  accessu  prohibitos:  Deum  vero  fuisse  pollicitum  illius  se  expugnatorem  fore  :  quia  scilicet  hoc  modo  antevertere  voluit,  ne  anxia  deliberatione  se  torquerent.  In  summa,  Deus  hoc  tam  felici  facilis  victoriae  exordio  providet,  ne  in  futurum  animos  despondeant.  Notandus  interea  populi  illius  stupor,  qui  Dei  potentiae  muros  suos  et  portas  opponit,  ac  si  difficilius  esset  paucos  asseres  confringi  vel  dissolvi,  quam  arefieri  Iordanem.  3.  Circuibitis  itaque.  Promissio  quidem  per  se  ad  spem  victoriae  idonea  et  efficax,  sed  cui  ratio  agendi  tam  ludicra  fidem  abrogat.  Iubet  Deus  uno  circuitu  quotidie  urbem  lustrare  usque  ad  septimum  diem,  quo  iubet  septies  eos  circuire,  clangere  tubis  et  vociferari:  quod  totum  nihil  aliud  fuit,  quam  pueriliter  ludere.  Verum  hoc  examine  probari  eorum  fidem  operae  pretium  fuit:  ut  in  re  ipsa  nihil  praeter  meram  frustrationem  cernentes,  acquiescerent  nihilominus  in  Dei  oraculo:  quo  etiam  consilio  saepe  virtutem  suam  sub  infirmitate  ad  tempus  occultat,  et  inanibus  nugis  videtur  ludere,  ut  eius  debilitas  tandem  omni  potentia  fortior  appareat,  et  stultitia  supra  omnem  sapientiam  refulgeat.  Sic  dum  ratione  sua  facessere  iussa  ab  eius  ore  pendent  Israelitae,  ineptiendo  longe  plus  proficiunt,  quam  si  violento  conatu  irruptionem  facerent,  murosque  quatefacerent  validissimis  et  innumeris  machinis.  Tantum  eos  ad  breve  tempus  stultescere  oportuit,  neque  appetere  nimium  acumen,  anxie  ac  subtiliter  de  eventu  sciscitando:  quia  id  fuisset  Dei  potentiae  quodammodo  viam  obstruere.  Interea  quanquam  ludibrio  esse  potuit  circularis  eorum  ambulatio,  tandem  prospero  successu  cognitum  fuit,  Deum  nihil  frustra  praecipere.  Alia  etiam  dubitatio  et  cura  obrepere  potuit  eorum  mentibus,  si  subito  erumperent  urbis  cives,  nullo  negotio  dissipatum  iri  exercitum,  quum  longe  diffusus  totam  urbem  circumdaret,  nec  acie  disposita  incederet  ad  excipiendos  insultus.  Sed  hac  quoque  30