20:466  Monsieur,  Nous  avons  receu  le  dernier  jour  de  may  les  lettres  lesquelles  il  vous  a  pleu  me  escrire  par  nostre  frere  et  serviteur  de  dieu  Mr.  de  Boysnormant,  ensemble  la  resolution  des  pointz  que  tant  nouz  desirions  scavoir  pour  le  repos  et  tranquilite  d'esprit  de  plusieurs  infirmes.  Et  aussi  pour  nous  rendre  d'autant  plus  certain  en  nostre  conscience,  si  nous  pouvions  faire  ces  choses  sans  estre  par  trop  grandement  contraires  a  la  parole  de  dieu:  lequel  nous  prions  jour  et  nuit  que  son  plaisir  soit  de  tellement  nous  conduire  en  nostre  charge  et  vocation  que  nous  ne  tendions  a  autre  but  qu'a  glorifier  son  sainct  nom  et  jnstruire  sa  pouvre  Eglise  en  sa  crainte  et  amour  selon  la  grace  qu'il  luy  a  pleu  nous  faire,  le  suppliant  affectueusement  nous  suporter  en  nos  feblesses  et  jnfirmites:  vous  priant  tous  au  nom  de  ce  grand  dieu  vivant  de  prier  pour  nous  Qu'il  luy  plaise  nous  fortifier  en  une  constence  invincible.  Car  certes  nous  avons  beaucoup  d'ennemis  a  l'entour  de  nous.  Mais  tant  y  a  qu'il  benit  tousiours  de  plus  en  plus  nostre  petit  labeur.  Dont  nous  pouvons  cognoistre  que  nostre  cause  s'en  y  ra  tantost  gaigner  si  c'est  son  bon  plaisir.  Nous  prenons  tousiours  fiance  en  nostre  Dieu,  estans  certains  et  asseurez  que  celuy  qui  est  pour  nous  est  tout  seul  plus  fort  pour  nous  delivrer  de  nos  ennemis  que  ne  sont  nos  ennemis  ensemble  puissans  pour  nous  destourner  de  luy  ou  pour  nous  espouvanter.  Nous  avons  este  ces  jours  passes  (par  le  conge  de  nostre  Eglise)  en  troys  petites  villes:  Montsegur,  Gensac  et  pelegrus  la  ou  nous  avons  commence  a  bastir  et  a  ediffier  un  petit  bastiment  sur  le  fondement  de  nostre  seigneur  Jesus  Christ.  Et  avons  trouve  les  pouvres  fideles  et  chrestiens  fort  disposes  pour  recevoir  ceste  pasture  celeste  Et  tout  ainsi  que  les  petiz  oyseaux  demandent  la  boschee  a  leur  mere  Aussi  ceux  ci  demandant  norriture  a  Dieu  par  le  mojen  de  ceux  qui  les  vont  visiter.  Nous  avons  donc  commence  a  planter  et  a  semer:  Dieu  par  son  sainct  Esprit  y  veuille  donner  bon  accroissement.  Il  y  a  un  dangier  cest  que  sous  pretexte  de  prescher  levangile  plusieurs  loups  ravissans  entrent  en  la  bergerie:  comme  nous  avons  desia  apperceu  a  Agen  quilz  avoient  receu  legalement  un  nomme  la  Sausaye  parisien  que  Mr.  du  gue  cognoist  a  ce  que  jay  peu  entendre:  lequel  les  freres  Tont  desohasse  et  envoye.  Il  est  vray  que  nostre  frere  Mr.  de  Boysnormant  m'a  escrit  qu'il  estoit  a  Nerac  la  ou  il  pretendoit  estre  ouj  en  ces  justifications.  Il  y  a  eu  aussi  un  petit  matin  de  moyne  nomme  Jerome  du  Verdier  qui  cest  defroque  et  a  presche  en  un  pre  ou  il  y  avoit  bien  six  on  sept  ccns  persones  et  apres  avoir  presche  firent  mille  jnsolences,  rompirent  croix  et  ydoles  quilz  trouvoient  par  leur  eglises  don  sen  ensuivit  meurtres  batteries  et  grands  scandales,  plusieurs  furent  menez  ao