5:465  EPISTOLA.  Merito  tu  quidem  et  pro  singulari  tua  pietate  optare  soles,  ut  compositis  dissensionum  turbis,  quibus  miserrime  hodie  iactari  videmus  ecclesiam,  quocunque  fieri  poterit  modo  partes  inter  se  reconcilientur.  Sed  quia  concordiam,  quae  ab  omnibus  expetenda  est,  coalescere  non  posse  putas,  nisi  romanus  pontifex  in  id  concilium  adhibeatur,  ubi  de  pacificatione  agetur,  idque  iuris  ac  honoris  deferendum  illi  existimas,  ne  quid  de  religionis  doctrina  vel  ecclesiae  regimine  absque  eius  consensu  et  autoritate  deliberetur,  in  eo  ne  diutius  erres,  volui  tibi  specimen  exhibere,  unde  intelligas  quid  nobis  sit  exspectandum,  si  ab  eius  nutu  totam  huius  causae  tractationem  suspendimus,  inde  enim  facile  colliges  quantum  tribuere  ipsius  iudicio  debeamus.  Hoc  quoque  optabile  esse  fateor,  non  tantum  ut  sua  autoritate  confirmaret,  quidquid  tantum  constitutum  fuerit,  sed  etiam  ut  in  doctrina  repurganda,  reformandaque  ecclesia,  ut  tantum  episcopum  decet,  aliis  omnibus  et  studio  et  exemplo  et  consilio  praeiret.  Verum  quando  omnem  ea  de  re  spem  bonis  abscindit,  nec  tantum  se  autorem  ecclesiae  in  melius  restituendae  non  fore  ostendit,  sed  extrema  quaelibet  tentaturum  potius  demonstrat  quam  ut  remedium  aliquod  tantis  malis  afferri  patiatur:  quid  obsecro  frustra  moramur,  dum  purae  sanctaeque  concordiae  legem  ipse  nobis  praescribat.  Neque  vero  postulo,  ut  de  ea  re  mihi  assentiaris,  sed  ut  consilium  hoc  expendas,  unde  aestimare  possis  an  de  ipso  temere  desperemus.  Ubi  legeris  minime  dubito,  quae  tua  est  prudentia,  qum  facile  sis  pronunciaturus,  nihil  minus  quam  de  illo  in  consilium  adhibendo  cogitandum  esse,  ubi  de  religionis  ecclesiaeque  restitutione  serio  agitur.  Vale.  Calvini  opera.  Vol  V.