40:465  465  IN  EZECHIELIS  PROPH.  CAP.  XIX.  466  dum  ubi  concurritur  adversus  noxiam  bestiam,  mutuo  sese  incitant  atque  hortantur  qui  volunt  eam  aggredi.  Sic  ergo  intelligunt,  undique  sublatum  fuisse  clamorem,  ut  uno  consensu  irruerent  contra  regem  Ioachim.  Sed  quia  idem  verbum  significat  ponere,  posset  etiam,  meo  iudicio,  non  male  accipi  de  consilio,  quod  scilicet  posuerint  consilium,  hoc  est,  ita  statuerint  inter  se,  ut  eum  deprehenderent  captivum.  Passivus  sensus  nullo  modo  convenit.  Nunc  ergo  tenemus  quid  velit  propheta  quum  dicit  gentes  statuisse  contra  eum,  hoc  est,  conspirasse  ut,  illum  caperent.  Nec  dubium  est  quin  adiuti  fuerint  Chaldaei  a  vicinis  omnibus.  Primo  scimus  Iudaeos  fuisse  aliis  gentibus  exosos:  deinde  audacia  et  temeritas  huius  regis  provocavit  multos,  ut  vel  Babylonios  accerserent,  vel  cupide  illos  iuvarent:  et  quia  per  se  vix  audebant  movere  bellum,  alienis  auspiciis  conspirarent  contra  regem  Ioachim.  Hoc  ergo  quantum  attinet  ad  gentes  vicinas.  De  solis  Chaldaeis  non  potest  hoc  intelligi,  quia  tametsi  habebant  sub  ditione  sua  alios  populos,  et  monarchia  illa  voraverat  alteram,  ut  Assyrii  pars  essent  chaldaici  exercitus:  quia  tamen  de  circuitu  loquitur  propheta,  et  dicit  undique  fuisse  conclusum  regem  Ioachim,  necesse  est  hoc  adscribi  vicinis  gentibus,  quae  non  tantum  favebant  Babyloniis,  sed  suis  auxiliis  et  opibus  eos  iuvabant,  quemadmodum  ex  aliis  locis  satis  colligitur.  Tandem  dicit  expandisse  rete  suum,  qua  metaphora  vel  consilia  intelligit,  vel  studia  et  conatus.  Nam  antequam  aperte  bellum  susciperent  vicinae  gentes  contra  Iudaeos,  minime  dubium  est,  quin  occulta  consilia  agitaverint  quomodo  possent  in  suas  partes  attrahere  Chaldaeos,  et  variis  artibus  se  insinuaverint  ac  si  laqueos  tenderent.  Quanquam  per  rete  etiam  possumus  intelligere  quidquid  allatum  ab  ipsis  fuit  apparatus  ad  perdendum  regem  Ioachim.  In  summa  dicit  fuisse  captum  in  fovea  gentium,  hoc  est,  fuisse  oppressum  tam  insidiis  quam  vi  aperta.  De  fovea  loquitur,  quia  facit  regem  similem  leoni.  Sed  nihil  absurdi  est  si  extendamus  nomen  foveae  etiam  ad  hostilem  violentiam,  qua  tandem  oppressus  fuit  Ioachim.  Sequitur,  9.  Et  posuerunt  eum  in  clausuram  (vel  posuerunt  in  clausura,  aut  custodia:  vel  in  carcerem.  Vetus  interpres,  in  caveam),  et  adduxerunt  in  catenis  ad  regem  Babylonis,  deduxerunt  in  munitiones  (hoc  est,  in  carcerem  arctum  et  bene  observatum),  ut  non  audiatur  vox  eius  amplius  in  montibus  Israel*  Prosequitur  eandem  sententiam:  dicit  regem  Ioachim  posteaquam  fuit  captus,  fuisse  constrictum  compedibus,  vel  catenis:  postea  adiungit  fuisse  deductum  ad  regem  babylonium:  tertio  fuisse  con-  Calvini  opera.  Vol.  XL.