35:464  chaume  :  et  se  mocque  du  branle  de  la  pieque.  21.  Sous  lui  sont  tests  aigus,  et  s'estend  ce  qui  est  pointu  sur  la  boue.  22.  Il  fait  bouillir  le  profond,  comme  une  chaudiere,  et  met  la  mer  comme  un  mortier.  23.  Il  fait  reluire  le  sentier  apres  soi,  et  repute  l'abysme  comme  chose  vieille.  24.  Sa  seigneurie  n'est  point  sur  la  terre,  et  est  fait  pour  ne  rien  craindre.  25.  Il  voit  toute  haute  chose:  c'est  le  roi  sur  tous  les  fils  d'orgueil.  Nous  monstrasmes  hier  que  Dieu  apres  avoir  produit  plusieurs  animaux  de  la  terre  pour  tesmoignage  de  sa  vertu  et  de  sa  gloire,  amene  ici  les  elephans  d'un  coste,  et  les  baleines  de  l'autre.  Et  c'est  pour  la  conclusion  du  propos,  Que  si  les  hommes  ne  contemplent  point  l'essence  de  Dieu,  si  estce  qu'ils  doivent  sentir  quelle  est  sa  maieste  seulement  en  regardant  les  bestes  qu'il  a  creees,  et  sur  tout  celles  qui  sont  pour  nous  effrayer  de  leur  regard,  afin  que  Dieu  soit  tant  plus  glorifie  par  nous.  Or  hier  nous  vismes  ce  qui  estoit  traitte  touchant  l'elephant,  qui  est  une  masse  terrible,  et  qui  nous  doit  bien  espouvanter.  Mais  si  nous  tremblons  devant  une  beste:  faut-il  que  nous  facions  des  hardis  contre  Dieu,  pour  plaider  s'il  nous  chastie,  pour  nous  despiter  quand  il  nous  voudra  humilier?  Fautil  que  nous  soyons  si  fols  de  murmurer  contre  sa  iustice,  et  lui  vouloir  contredire  en  rien,  et  vouloir  abbaisser  ou  diminuer  son  empire?  Ainsi  donc  que  les  hommes  cognoissent  leur  rage  quand  ils  s'attachent  a  Dieu,  veu  que  les  bestes  les  font  trembler.  Or  devant  que  passer  outre,  nous  avons  a  noter  sur  ce  qu'il  y  a  une  si  longue  deduction  de  ceste  espece  de  bestes  terrestres  que  nous  dismes  hier  estre  elephans  (combien  qu'il  le  nomme  ici  du  mot  general  Behemoth)  et  aussi  une  deduction  plus  longue  de  Leviathan:  qu'on  a  cuide  qu'ici  par  allegorie  il  soit  parle  du  diable,  plustost  que  d'elephans  ou  de  baleines:  et  a  on  voulu  approuver  ceste  phantasie  par  ce  qui  est  dit  en  la  fin,  que  c'est  le  roi  des  enfans  d'orgueil  que  ceste  baleine.  Or  en  parlant  de  ceste  espece  de  bestes  que  nous  touchasmes  hier,  il  estoit  dit  que  Dieu  les  fait  manger  le  foin  et  l'herbe  comme  aux  boeufs.  Nous  voyons  donc  que  c'est  pour  nous  declarer  la  puissance  de  Dieu  en  choses  visibles:  et  non  point  pour  nous  descrire  le  diable.  Quant  a  ce  mot  de  Leviathan,  par  toute  l'Escriture  il  signifie  balesne:  et  nous  voyons  cela