25:464  per  dispensationem  Deo  inferior.  Iam  quod  docent  veteres  libenter  recipio,  dum  apparuit  olim  Christus  in  forma  hominis,  praeludium  fuisse  mysterii  quod  deinde  fuit  exhibitum,  quando  manifestatus  est  in  carne  Deus.  Cavendum  tamen  ne  imaginemur  Christum  tunc  induisse  carnem:  quando  non  legitur  filium  suum  misisse  Deus  in  carne  ante  plenitudinem  temporum:  deinde  quatenus  homo  est,  filium  Davidis  esse  oportet.  Verum  ut  apud  Ezechielem  legitur,  similitudo  hominis  duntaxat  fuit  (Ezech.  1,  26).  Caeterum  fueritne  substantiale  corpus,  an  forma  exterior  duntaxat,  argutius  disputare  supervacuum  est,  contendere  vero  noxium.  Superest  una  quaestio,  quomodo  se  nunc  venisse  dicat  princeps  exercitus  Dei,  qui  populum  fidei  suae  commissum  non  deseruerat:  et  nuper  incomparabile  praesentiae  suae  specimen  ediderat  in  traiectu  Iordanis.  Atqui  trito  scripturae  usu  dicitur  ad  nos  venire  Deus,  ubi  re  ipsa  sentimus  eius  auxilium,  quod  remotum  videtur,  nisi  experientia  patefiat.  Perinde  igitur  est,  ac  si  operam  suam  ad  obeunda  quae  instabant,  certamina  offerret:  ac  suo  adventu  promitteret  felicem  debellandi  exitum.  Ex  adoratione  certo  colligi  non  potest,  an  Iosue  Christo  probe  cognito  divinum  honorem  exhibuerit.  Verum  roganda  quid  Adonai  servo  suo  praecipiat,  imperium  defert  quod  nonnisi  in  Deum  competit.  15.  Solve  calceamentum.  Tantum  quo  sanctior  sit  visio,  et  in  signum  reverentiae  et  timoris  exigit  magnus  angelus,  ut  calceos  exuat  Iosue.  Idem  et  Moses  sibi  iniunctum  fuisse  refert  in  monte  Sinai  (Exo.  3,  5),  non  alia  ratione,  nisi  quod  gloriam  suam  Deus  illic  manifestabat.  Neque  enim  aliunde  maior  uni  quam  alteri  loco  sanctitas,  nisi  ex  peculiari  dignatione.  Ita  Iacob  exclamat  (Gen.  28,  17)  locum  ubi  propius  Deum  cognoverat,  esse  domum  eius,  terribilem  locum  et  portam  coeli.  Ergo  quod  iubetur  sanctus  vir  calceos  sibi  detrahere,  hac  caeremonia  Deus  obsignat  praesentiae  suae  fidem,  et  plus  ponderis  addit  visioni  :  non  quod  pedum  nuditas  per  se  censeatur  in  Dei  cultu:  sed  quia  eiusmodi  subsidiis  adiuvanda  est  hominum  infirmitas,  quo  se  melius  ad  venerationem  excitent  et  comparent.  Porro  sicuti  Deus  loca  in  quibus  apparet,  sanctificat  sua  praesentia:  ita  mihi  probabile  est  hoc  elogio  commendari  praestantiam  terrae  Chanaan,  in  qua  sibi  domicilium  elegerat  Deus,  ut  pure  illic  coleretur.  Unde  et  passim  vocatur  eius  requies  (Ps.  95,  l  l  et  132,  14).  Laudatur  in  fine  versus  obedientia  Iosue,  ut  eius  exemplo  discat  posteritas  sancte  in  ea  terra  pietatem  colere.  Ita  videtur  tacita  subesse  comparatio,  vel  antithesis,  quae  extollat  terram  Chanaan  prae  aliis  regionibus.