25:463  463  COMMENTARIUS  IN  IOSUE  CAP.  V.  464  vix  tamen  adducti  sunt  tot  miraculis,  ut  serio  agnoscerent,  se  illic  esse  Dei  inquilinos.  Itaque  visio  haec  saeculis  omnibus  prodesse  debuit,  ne  ambiguum  esset  Dei  beneficium.  Quod  dicitur  levasse  oculos,  ad  certitudinem  valet:  nequis  evanido  spectro  aciem  eius  perstrictam  fuisse  existimet.  Formidabile  vero  spectaculum  primo  intuitu  fuit:  quia  verisimile  est  Iosue  tunc  fuisse  solum,  sive  orandi  causa,  sive  urbis  inspiciendae  consilio,  ab  hominum  frequentia  secesserit:  atque  hoc  secundum  magis  placet,  seorsum  fuisse  speculatum  qua  parte  urbs  esset  oppugnanda,  ne  alios  terreret  difficultas.  Certe  comites  abfuisse  apparet,  dum  solus  occurrit:  nec  dubium  quin  paratus  ad  certamen,  si  in  hostem  incidisset.  Caeterum  tanquam  de  homine  interrogat,  quia  angelum  non  agnoscit  nisi  ex  responso.  Atque  haec  dubitatio  visioni  plus  fidei  rursus  conciliat,  dum  paulatim  ab  hominis  quem  alloquitur  aspectu  ad  angeli  cognitionem  deducitur.  Quanquam  verba  sonant,  non  quemlibet  fuisse  angelum,  sed  praecipuae  excellentiae.  Vocat  enim  se  principem  exercitus  Dei,  quod  tam  de  electo  populo,  quam  de  angelis  potest  intelligi  :  sed  prior  sententia  rectior  est  :  quia  nihil  insolitum  profert  Deus  :  sed  quod  ante  legimus  praestitum  Mosi  fuisse  continuat.  Ac  scimus  Mosen  ipsum  hoc  beneficium  aliis  omnibus  praetulisse:  et  merito,  quia  palam  et  familiariter  Deus  illic  gloriam  suam  manifestabat.  Itaque  promiscue  vocatur  angelus,  et  insignitur  elogio  Dei  aeterni.  Cuius  rei  Paulus  nobis  idoneus  est  testis,  qui  diserte  testatur  fuisse  Christum  (1.  Cor.  10,  4).  Et  Moses  ipse  in  persona  mediatoris  Deum  praesentem  amplexus  est  (Exod.  32,  34).  Nam  ubi  post  vitulum  fabrefactum  pronunciat  Deus,  se  non  fore  amplius  populi  ducem,  simul  se  unum  ex  angelis  daturum  promittit,  sed  quasi  ex  turba  :  quod  Moses  vehementer  deprecatur.  Nempe  quia  remoto  mediatore,  sperare  non  poterat  Deum  fore  propitium.  Rarum  itaque  favoris  Dei  pignus  fuit,  praesto  adesse  principem  et  caput  ecclesiae,  cui  Moses  assueverat.  Et  certe  non  aliter  rata  potuit  esse  Dei  adoptio  quam  per  manum  mediatoris.  14.  Non:  sed  dux  exercitus.  Quamvis  negatio  apte  utrique  membro  conveniat,  quia  neque  Israelita  erat  neque  Chananaeus:  ac  si  praecise  negaret  se  esse  hominem  mortalem,  commode  tamen  restringere  licebit  ad  secundum  membrum,  ubi  rogabat  Iosue  an  esset  ex  hostibus.  Porro  quando  in  ea  re  parum  est  momenti:  satis  sit  tenere  quod  praecipuum  est,  venisse  ut  praeesset  electo  populo,  quem  honorifice  appellat  Dei  exercitum.  Quod  se  alium  a  Deo  facit,  in  eo  notatur  personalis  distinctio,  non  autem  scinditur  unitas  essentiae.  Diximus  apud  Mosen  saepe  nomen  Iehovae  adscribi  angelo  praesidi:  qui  haud  dubie  unigenitus  erat  Dei  filius.  Nempe  quia  et  verus  est  Deus:  et  tamen  in  persona  mediatoris