40:461  461  IN  EZECHIELIS  PROPH.  CAP.  XIX.  462  ululabant  Iudaei,  et  subsistebant  duntaxat  in  caeco  dolore,  neque  quaerebant  cur  Deus  esset  illis  tantopere  infestus.  Tolle  ergo  lamentationem,  inquit,  ad  principes,  vel  contra  principes  Israel.  Hoc  modo  non  eximit  Deus  populum  a  culpa.  Tantum  significat  non  vulgus  modo  esse  perditum,  sed  ipsum  quoque  florem  populi,  et  eos  omnes  qui  praediti  erant  aliqua  existimatione.  Dicit  ergo  matrem  eorum  accubuisse  inter  leones.  Alludit  ad  coitum:  quasi  diceret  genitos  esse  ex  leonibus,  sicut  ante  vidimus  fuisse  sobolem  Chanaan  :  imo  propheta  vocabat  Iudaeam  sororem  Sodomae,  et  Samariae.  Nunc  quum  dicit  matrem  accubuisse  inter  leones,  significat  verecunde  fuisse  permixtos  gentium  corruptelis,  ita  ut  nihil  ab  ipsis  differrent.  Atqui  Deus  ipsos  ea  lege  sibi  elegerat  in  peculium,  ut  essent  separati  ab  omnibus  gentium  sordibus.  Fuit  ergo  haec  quaedam  abolitio  gratiae  Dei,  dum  mater  populi  accubuit  inter  leones,  hoc  est  dum  ipsi  omnes  promiscue  adsciverunt  omnes  gentium  corruptelas,  et  perversos  mores.  Dicit  educasse  catulos,  vel  leunculos,  quos  scilicet  ex  leonibus  susceperat:  quia  geniti  erant  ex  impuro  coitu,  non  quod  aliunde  ducerent  originem,  quam  a  filiis  Abrahae,  sed  quia  erant  degeneres,  ut  ante  dictum  fuit.  Postea  addit,  quod  catulus  ille  leonis,  vel  leunculus,  creverit  donec  factus  esset  leo:  tunc  didicit  praedam  rapere,  inquit,  et  homines  vorare.  Loquitur  quidem  de  rege  Ioachas,  Iosiae  filio:  sed  ante  admonuit  totum  populum  esse  leonino  ingenio,  et  principes  populi,  qui  eximii  erant,  esse  tanquam  catulos.  Quod  ergo  unus  hic  leo  in  medium  profertur,  id  referri  debet  ad  violentiam,  qua  scelestus  ille  rex  prodidit  quali  esset  ingenio.  Sed  tamen  si  quaeritur  unde  prodiisset  leo  ille,  nempe  ex  turba  fratrum:  omnes  autem  erant  leonum  catuli,  vel  leunculi.  Non  poterant  omnes  vel  singuli  exercere  tyrannidem:  sed  nemo  erat  qui  fratrem  suum  non  voraret:  nemo  erat  qui  non  addictus  esset  praedis  et  rapinis.  Tantum  rex,  quia  solutus  erat  omni  metu,  potuit  prae  aliis  impune  grassari  per  rapinas  et  praedas.  Videmus  ergo  non  solum  regem  hic  damnari,  sed  proponi  quasi  imaginem  totius  gentis:  quia  quum  nemo  compesceret  eius  libidinem,  potuit  maiore  licentia  praedari,  et  vorare  homines.  Postea  addit  gentes  audiisse,  et  captum  fuisse  in  earum  fovea.  Hic  non  tantum  docet  Ezechiel  proiectum  fuisse  e  regio  solio  Ioachas,  et  mancipatum  Aegyptiis,  quia  Deus  saevitiam  eius  perspexerat:  sed  quia  erat  etiam  perspecta  gentibus,  imo  famosa  inter  omnes.  Hoc  autem  modo  significat  intolerabilem  fuisse  saevitiam  regis  Ioachas,  de  quo  loquitur,  quum  vicinae  omnes  gentes  audita  eius  fama  conspiraverint  ad  eum  profligandum  :  atque  ita  captus  fuerit  in  earum  fovea,  et  comprehensus  catenis,  et  abductus  in  Aegyptum.  Designat,  ut  dixi,  Ioachas,  quem  rex  Pharao  Necho  captivum  abduxit.  Nam  quum  putaret  Aegyptios