35:460  que  nous  dependions  du  tout  de  nostre  Dieu,  et  que  nous  soyons  sauvez  par  sa  main.  Voila  pour  un  Item.  Or  de  primeface  il  semble  que  cela  soit  assez  vulgaire,  comme  les  hommes  de  nature  sont  enseignez  de  recourir  a  Dieu:  mais  cependant  ne  voit-on  pas  ceste  yvrongnerie,  ou  plustost  ceste  rage,  qui  nous  transporte,  qu'un  chacun  se  cuide  sauver,  qu'un  chacun  se  cuide  garentir?  Et  qui  nous  l'a  dit,  sinon  que  nous  sommes  preoccupez  de  ceste  fausse  resverie  que  Satan  nous  a  mis  au  cerveau,  qu'il  y  a  quelque  vertu,  quelque  iustice,  quelque  sagesse  en  nous?  Ainsi  donc  notons  que  ce  n'est  point  une  doctrine  vulgaire,  quand  Dieu  nous  reproche  que  nul  de  nous  ne  se  peut  sauver  de  sa  main:  car  c'est  pour  nous  monstrer  qu'il  nous  faut  defier  de  nous  et  de  toutes  nos  vertus,  qu'il  nous  faut  estre  aneantis  tellement,  que  nous  n'ayons  ni  repos  ni  appui,  ni  contentement  qu'en  luy  seul.  Qu'est-ce  donc  qui  nous  sauve?  C'est  la  main  de  Dieu.  Et  pourquoy?  C'est  sa  pure  bonte  et  gratuite:  car  si  l'homme  avoit  quelque  chose  de  soy,  Dieu  ne  luy  en  porteroit  point  d'envie:  il  diroit,  Et  bien,  partissons,  voila  qui  est  a  moy,  voila  qui  t'est  deu.  Car  Dieu  a-il  besoin  d'emprunter  de  nous?  Faut-il,  pour  se  faire  valoir  qu'il  vienne  ravir  ce  qui  nous  est  deu,  et  ce  que  nous  tenons  de  droit?  Nenny,  non.  N'imaginons  point  une  telle  phantasie,  et  confessons  qu'il  n'y  a  une  seule  goutte  de  salut  en  nous:  mais  qu'il  faut  que  nous  recourions  simplement  a  nostre  Dieu.  Voila  ce  que  nous  avons  a,  noter  en  ce  passage.  Or  il  est  vray  que  quelque  fois  les  meschans  seront  destruits  et  ruinez  par  le  moyen  des  hommes  :  car  la  iustice  est  ordonnee  a  ceste  fin-la  :  mais  ceux  qui  sont  au  siege  de  iustice  et  qui  ont  le  glaive  en  la  main,  peuvent-ils  rien  d'eux-mesmes?  N'est-ce  pas  d'autant  que  Dieu  les  a  la  constituez,  et  qu'il  luy  plaist  de  se  servir  d'eux  comme  d'instrumens?  Ainsi  donc  il  ne  faut  point  que  les  moyens  que  Dieu  a  ordonnez  en  ce  monde  pour  declarer  sa  maieste,  sa  puissance,  sa  iustice,  que  cela  l'obscurcisse,  et  que  sa  gloire  n'en  soit  pas  si  bien  cognue  :  mais  c'est  afin  que  le  lustre  en  soit  tant  plus  grand.  Et  au  reste,  sans  que  les  hommes  y  mettent  la  main,  nous  voyons  comme  il  besongne  quand  il  luy  plaist.  Pour  conclusion  il  nous  est  ici  remonstre  que  Dieu  a  cree  les  bestes,  voire  en  la  mer  et  en  la  terre,  et  des  bestes  espouvantables  qui  nous  doivent  bien  faire  trembler,  afin  que  nous  ne  soyons  plus  si  fretillans  de  nous  venir  adresser  contre  luy.  Et  notamment  il  est  parle  de  Behemoth,  Or  le  nom  de  Behema,  emporte  simplement  beste,  et  les  boeufs,  et  les  autres  bestes  y  sont  comprinses.  Ici  en  nombre  pluriel  il  est  dit,  Voicy  Behemoth,  que  tay  cree  avec  toy:  et  est  parle  comme  d'une  seule