32:460  Quand  nous  serions  les  plus  meschans  du  monde,  si  ne  faut  il  point  que  noz  fautes  soyent  pour  mettre  le  nom  de  Die  en  contumelie.  Il  n'est  point  subiet  a  noz  macules.  Mais  tant  y  a,  qu'entant  qu'en  nous  est,  nous  avons  fait  comme  le  Prophete  reproche  au  peuple  Iudaique:  nous  avons  fait  blasphemer  le  nom  de  Dieu.  Il  nous  avoit  revele  sa  volunte  et  nous  luy  avons  este  rebelles.  Il  parle  encore,  et  noz  cueurs  sont  endurcis  comme  enclumes,  il  nous  pourroit  bien  chastier  iustement,  quand  mesme  il  nous  abysmeroit:  tous  l'avons  bien  merite.  Ie  ne  parle  point  seulement  de  Geneve,  mais  des  villes  et  pays  ou  son  Evangile  est  annonce.  Nostre  vie  devoit  auiourdhuy  reluire  pour  fermer  la  bouche  aux  infideles,  qu'ilz  n'osassent  point  nous  regarder.  Que  nous  reste  il?  nous  voyons  nostre  vie  scandaleuse  d'un  coste  en  abusant  de  ses  graces.  Enquoy  nous  avons  a  penser  que  nous  sommes  trop  plus  que  coulpables.  Voicy  la  guerre  de  l'autre  coste  notamment  contre  l'Evangile.  Les  iniques  ne  machinent  sinon  de  faire  une  confusion  universelle  que  tout  soit  ruine.  Nous  avons  bien  occasion  de  penser,  helas  Seigneur  quand  tu  nous  aurois  exterminez,  nous  ne  te  pouvons  accuser  de  cruaute:  nous  en  sommes  dignes.  Faut  il  que  nous  demeurions  la  confus?  nenny.  Mais  convertissons  nous  en  vraye  repentance  a  nostre  Dieu,  pensons  a  nostre  vie  passee,  que  nous  ayons  une  vraye  tristesse  d'avoir  mal  vescu,  que  cela  se  monstre  par  les  fruictz,  que  chascun  soit  esmeu  de  se  convertir  a  Dieu.  Tu  nous  chasties,  Seigneur.  Quand  nous  pensons  a  nous:  il  n'y  a  qu'occasion  d'estre  troublez,  mais  quand  nous  regardons  ceux  qui  nous  font  la  guerre,  non  point  pour  noz  vices,  combien  que  tu  nous  pouvois  punir  pour  iceux,  mais  qu'ilz  veulent  ruiner  le  Regne  de  ton  Filz,  qui  doit  estre  maintenu  par  toy,  c'est  le  fondement  de  nostre  hardiesse.  Ce  pendant  si  faut  il  commencer  par  humilite.  Vueilles  oublier  noz  fautes.  Regarde  a  l'honneur  de  ton  nom,  Seigneur.  S'ilz  viennent  a  bout  de  leur  entreprise,  voila  comme  a  bride  avallee  ton  nom  sera  blaspheme.  O  Seigneur,  que  tu  y  mette  ordre,  que  tu  y  mette  remede.  C'est  auiourdhuy  le  temps  de  faire  la  priere  qui  est  icy  escrite:  combien  qu'elle  est  pour  tousiours,  toutesfois  quand  la  necessite  est  urgente,  il  en  faut  faire  nostre  profit.  Nous  devrions  bien  avoir  un  autre  zele.  Nous  ne  scavons  que  c'est  de  l'union  que  nostre  Seigneur  a  voulu  estre  entre  ses  membres.  Sommes  nous  de  son  Eglise?  il  faut  avoir  une  conionction  spirituelle  avec  tous  fideles.  Comme  il  n'y  a  qu'un  seul  Dieu,,  un  seul  redempteur,  une  seule  doctrine  veritable,  une  seule  Foy,  un  Baptesme,  aussi  nous  faut  il  tous  estre  un  corps.  Il  faut  donc  que  nous  ayons  une  conionction  les  uns  avec