25:460  eorum  libidini  et  violentiae  pateant:  ac  si  consulto  eos  morti  obiiceret.  Nam  omnes  ex  vulnere  debilitatos  simul  decumbere  oportuit:  ut  nullo  negotio  iugulari  potuerint.  Si  enim  duobus  filiis  Iacob  impune  in  urbem  Sichem  perrumpere  liberum  fuit,  et  civibus  occisis  eam  diripere  (Gen.  34):  quanto  facilius  vicinis  gentibus  fuit,  Israelitas  eodem  modo  sauciatos  aggredi  et  passim  trucidare?  Fuit  igitur,  ut  dixi,  hoc  valde  asperum  examen:  quo  maiori  laude  digna  est  promptitudo  obsequii.  Quanquam  locus  ipse  videtur  Dei  consilio  electus,  quo  propensiores  essent  ad  parendum,  si  trans  Iordanem  idem  mandatum  fuisset,  timendum  erat  ne  animos  desponderent,  et  hac  remora  iniecta,  iterum  detrectarent  terram  ingredi.  Nunc  quum  felicibus  auspiciis  quasi  Dei  manu  in  possessionem  adducti,  sublato  hoc  uno  obstaculo  certam  debellandi  spem  concipiunt,  nihil  mirum  si  libentius  obtemperent  quam  si  nondum  fuissent  tam  praeclare  confirmati.  Ipse  quoque  terrae  conspectus  stimulos  addere  debuit,  quum  ideo  se  rursus  Deo  consecrari  intelligerent,  ne  terram  sanctam  polluerent  eorum  praeputia.  6.  Dixit  Iehova  ad  Iosuam.  Opprobrium  Aegypti  quidam  exponunt,  quod  praeputium  eos  similes  redderet  Aegyptiis,  profanos  scilicet  ac  ignominiae  macula  notatos:  ac  si  dictum  esset  receptos  esse  in  Dei  peculium,  ubi  de  integro  insigniti  fuerunt  hac  nota,  ut  ab  immundis  gentibus  differrent.  Alii  active  accipiunt,  factum  esse  ne  posthac  ludibrio  sint  Aegyptiis,  ac  si  Deus  eos  fefellisset  :  quod  tanquam  longe  petitum  repudio.  Alii  non  fore  amplius  falso  dedecori  obnoxios,  ac  si  deos  gentis  illius  coluissent.  Ego  vero  existimo  potius  intelligi,  liberatos  esse  invidia  criminis,  quo  alioqui  gravati  essent.  Odiosum  erat  excusso  iugo  a  rege,  sub  cuius  ditione  agebant,  descivisse.  Porro  quia  iactabant  Deum  iniustae  tyrannidis  fuisse  vindicem,  exprobrare  facile  erat  falso  eos  obtendere  nomen  Dei.  Ergo  pro  fugitivis  habiti  essent,  nisi  ad  eluendum  dedecus  opposita  fuisset  circumcisio,  qua  iam  obsignata  erat  Dei  electio  in  eorum  carne  antequam  descenderent  in  Aegyptum,  Proinde  vetusti  foederis  instauratione  palam  factum  est,  non  fuisse  rebelles  legitimo  imperio,  nec  propria  temeritate  abiisse,  sed  libertatem  a  Deo  fuisse  redditam,  qui  pridem  eos  in  fidem  et  clientelam  receperat.  Ab  hac  devolutione  probri  nomen  loco  impositum  fuit.  Nam  qui  Gilgal  putant  vocari  rescissam  pelliculam,  quia  sit  velut  rotundus  circulus,  discedunt  a  verbis,  et  commentum  minime  necessarium  longe  accersunt,  quum  res  per  se  liqueat,  locum  fuisse  vocatum  revolutionem,  quia  illic  Deus  populum  suum  ab  ignominia  qua  indigne  onerabatur,  asseruit.  Quod  Iosephus  libertatem  interpretatur,  vanum  et  ridiculum  est.  Unde  apparet  non  minus  linguae  hebraicae  fuisse  ignarum  quam  scientiae  legalis.