54:46  nostre  coste  nous  luy  tournons  le  dos,  et  que  nous  desdaignions  d'accepter  le  salut  qu'il  nous  presente,  ne  voila  point  une  malice  trop  enorme?  Notons  bien  donc,  quand  sainct  Paul  accuse  ici  ceux  qui  n'ont  point  este  constans,  et  ne  prenent  point  courage  pour  soustenir  tous  les  assauts  qui  leur  sont  faits  et  dressez  a  cause  de  l'Evangile,  qu'il  n'y  a  nulle  doute  qu'il  n'ait  aussi  voulu  confermer  les  fideles  en  une  bonne  esperance  pour  l'advenir,  leur  remonstrant  ce  que  Dieu  avoit  desia  fait  pour  eux.  Car  quand  Dieu  nous  a  donne  quelque  signe  de  sa  bonte,  c'est  afin  que  nous  esperions  de  luy  le  semblable,  et  que  nous  attendions  qu'il  parface  ce  qu'il  a  commence.  Si  donc  Dieu  nous  a  sauvez,  et  nous  a  appelez  d'une  vocation  saincte,  pensons-nous  qu'il  nous  vueille  laisser  au  milieu  du  chemin?  Quand  il  nous  a  monstre  nostre  salut,  qu'il  nous  a  donne  les  iambes  pour  marcher,  qu'il  nous  a  donne  son  Evangile  par  lequel  il  nous  convie  a  son  Royaume,  qu'il  nous  ouvre  la  porte,  quand  donc  il  a  ainsi  besongne,  pensons-nous  qu'il  nous  vueille  placquer  la,  et  se  mocquer  de  nous,  et  faire  que  sa  grace  soit  perdue  et  inutile?  Nenni,  non:  esperons  qu'il  amenera  son  oeuvre  a  perfection.  Ainsi  donc  marchons  vertueusement,  et  puis  que  Dieu  a  desia  desploye  une  partie  de  sa  puisance  envers  nous,  ne  doutons  point  qn'il  ne  continue  pour  l'advenir,  et  que  nous  n'ayons  la  victoire  parfaite  contre  Satan  et  nos  ennemis,  voire  quand  nous  attendrons  que  Iesus  Christ  estant  nostre  chef  et  capitaine,  monstre  que  toute  vertu  luy  est  donnee  de  Dieu  son  Pere,  afin  de  nous  la  communiquer.  Nous  voyons  donc  maintenant  l'intention  de  sainct  Paul.  Et  ainsi  apres  avoir  conceu  la  puissance  de  Dieu,  de  laquelle  il  a  este  fait  n'agueres  mention,  que  nous  venions  adiouster  quant  et  quant  ceste  remonstrance  qui  nous  est  faite.  Or  ca,  Dieu  nous  a  par  effect  et  experience  testifie  qu'il  ne  nous  defaudra  iamais  au  besoin.  Et  pourquoy?  Car  il  nous  a  desia  sauvez.  Quand  il  nous  a  appelez  a  l'Evangile,  qu'est-ce  sinon  une  redemption  que  Dieu  a  faite  de  nous  qui  estions  peris?  Or  Dieu  nous  a-il  ainsi  sauvez?  Attendons  de  luy,  puis  que  nous  sommes  encores  au  chemin,  qu'il  nous  amenera  au  salut.  Il  nous  a  appelez  d'une  vocation  saincte,  c'est  a  dire,  il  nous  a  choisis  a  soy,  il  nous  a  recueillis  en  ceste  confusion  universelle  du  genre  humain.  Quand  donc  nostre  Seigneur  nous  a  ainsi  retirez,  ne  nous  tiendra-il  point  sous  sa  main,  et  en  sa  conduite  iusques  en  la  fin?  Voila  donc  une  confirmation  certaine  de  la  puissance  de  Dieu,  que  nous  le  trouverons  tousiours  prest  a  nous  secourir,  moyennant  que  nous  y  mettions  nostre  fiance,  et  que  nous  reduisions  en  memoire  comme  desia  nous  l'avons  sentie.  Mais  pour  bien  faire  nostre  profit  de  ceste  doctrine,  cognoissons  en  premier  lieu,  que