48:46  Ergo  eorum  sermones  vulgari  aliorum  modo  iniquum  est  metiri,  quum  spiritu  directore  longos  annorum  circuitus  transscendant.  Unde  et  videntes  dicuntur:  quod  tanquam  in  alta  specula  collocati  videant  quae  propter  longinquam  distantiam  aliis  sunt  abscondita.  Altera  ratio  est,  quod  peculiariter  illi  promissus  fuerat  Christus.  Hoc  autem  axioma  passim  ita  receptum  erat  apud  Iudaeos,  ut  filium  Davidis  subinde  in  ore  haberent,  quoties  de  Christo  fiebat  mentio.  Non  sunt  quidem  eiusmodi  argumenta,  quae  necessario  evincant,  de  Christo  exponendum  esse  hoc  vaticinium  :  neque  etiam  fuit  istud  Petri  consilium:  sed  primo  contrariam  obiectionem  praevenire  voluit,  unde  talis  Davidi  rei  incognitae  divinatio.  Dicit  ergo  et  revelatione  prophetica,  et  singulari  promissione  notum  illi  fuisse  Christum.  Deinde,  apud  sanos  et  integros  valebat  hoc  principium  quod  Paulus  tradit,  Christum  esse  finem  legis  (Rom.  10,  4).  Nemini  ergo  tunc  dubium  erat,  quin  prophetis  omnibus  hic  fuisset  scopus,  ad  Christum  pios  manu  ducere.  Ideo  quidquid  insigne  et  quasi  extraordinarium  loquuti  erant,  vulgo  persuasum  erat  in  Christum  vere  competere.  Proinde  notandum  est,  solide  ratiocinari  Petrum,  quum  Davidi  non  fuisse  obscurum  colligit,  quod  summum  erat  revelationum  omnium  caput.  Iureiurando  iurasset.  Iuravit  Deus,  non  tantum  ut  fidem  suae  promissioni  apud  Davidem  faceret,  sed  etiam  ut  pluris  aestimaretur  res  promissa.  Et  in  hunc  finem,  meo  iudicio,  hic  repetitur,  ut  cogitent  Iudaei,  quantum  habuerit  momenti  promissio,  quam  Deus  ita  insignierat.  Et  nobis  quoque  utilis  est  eadem  admonitio.  Neque  enim  dubium  est,  quin  pacti  excellentiam  commendare  Dominus  voluerit  solenni  interposito  iureiurando.  Interea  et  fidei  nostrae  infirmitati  hoc  aptum  est  remedium,  sacrum  Dei  nomen  pignoris  instar  nobis  obiici,  quod  eius  dictis  fidem  arroget.  Particula,  secundum  carnem,  aliquid  in  Christo  fuisse  carne  nobilius  subindicat.  Sic  ergo  ex  semine  Davidis  Christus  progenitus  est  homo,  ut  suam  interea  divinitatem  retineat,  atque  ita  diserte  exprimitur  inter  duas  naturas  distinctio:  quando  eadem  ratione  dicitur  Christus  filius  Dei  secundum  aeternam  suam  essentiam,  qua  semen  Davidis  secundum  carnem.  32.  Hunc  Iesum  excitavit  Deus:  cuius  omnes  nos  sumus  testes.  33.  Dextera  ergo  Dei  exaltatus,  et  promissione  spiritus  sancti  accepta  a  patre,  effudit  hoc  quod  vos  nunc  videtis  et  auditis.  34.  Neque  enim  David  adscendit  in  coelos.  Atqui  dicit  ipse:  Dixit  Dominus  Domino  meo,  sede  a  dextris  meis:  35.  donec  ponant  inimicos  tuos  scabellum  pedum  tuorum.  36.  Certo  igitur  cognoscat  tota  domus  Israel,  quod  Dominum  et  eundem  Christum  Deus  fecit  hunc  Iesum,  quem  vos  crucifixistis.