47:46  contentus  esse  possit,  vult  tamen  in  ecclesia  illustrari  suam  gloriam.  In  quo  singulare  amoris  erga  nos  sui  documentum  praebet,  quod  suam  gloriam  quasi  individuo  nexu  cum  salute  nostra  coniungit.  Restat  nunc  ut  se  ad  Christi  imitationem  singuli  comparent,  quando  in  capitis  exemplo  generalis  toti  corpori  doctrina  proponitur:  sicuti  docet  Paulus  Hom.  15  v.  3.  Ne  patiamur,  quantum  in  nobis  est,  sacrum  Dei  templum  ullo  modo  inquinari.  Interea  tamen  cavendum,  ne  quis  vocationis  suae  finis  transsiliat.  Zelum  omnibus  nobis  cum  filio  Dei  communem  esse  oportet:  at  non  omnibus  protinus  licet  flagellum  arripere,  ut  vitia  manu  corrigamus.  Neque  enim  eadem  nobis  potestas  data  est,  nec  idem  iniunctum  munus.  18.  Responderunt  ergo  Iudaei  ac  dixerunt  ei:  Quod  signum  ostendis  nobis,  quod  ista  facias  i  19.  Respondit  Iesus,  et  dixit  eis:  Destruite  templum  hoc,  et  in  tribus  diebus  erigam  illud.  20.  Dixerunt  ergo  Iudaei:  Quadraginta  et  sex  annis  exstructum  est  templum  hoc,  et  tu  in  tribus  diebus  eriges  iliud  P  21.  At  ille  dicebat  de  templo  corporis  sui.  22.  Quum  ergo  resurrexisset  a  mortuis,  recordati  sunt  discipuli  eius,  quod  hoc  dixisset  eis:  et  crediderunt  scripturae  et  sermoni  quem  dixerat  Iesus.  18.  Quod  signum  ostendis.  Quod  in  tanto  coetu  nemo  Christo  manum  iniecit,  nullus  ex  pecuariis  et  nummulariis  violenter  eum  repulit,  hinc  colligere  licet,  divinitus  fuisse  omnes  perculsos,  ut  attoniti  stuperent.  Quare  nisi  prorsus  excaecati  fuissent,  hoc  satis  illustre  erat  miraculum,  quod  unus  contra  multos,  inermis  contra  validos,  ignotus  contra  tantos  principes  tantum  ausus  fuerat.  Cur  enim  illi  non  obstabant,  quum  longe  superiores  essent,  nisi  quod  dissolutae  et  quasi  fractae  erant  eorum  manus?  causam  tamen  interrogandi  aliquam  habent.  Neque  enim  cuiusvis  est,  si  quid  vitiosum  est  aut  displicet  in  templo  Dei  statim  mutare.  Damnare  quidem  corruptelas  omnibus  liberum  est,  verum  si  ad  eas  tollendas  privatus  homo  manum  admovet,  temeritatis  arguetur.  Quia  mos  vendendi  in  templo  receptus  erat,  Christus  rem  novam  et  inusitatam  aggressus  est:  quare  merito  postulant  ut  se  a  Deo  missum  probet.  Sumunt  enim  principium  istud,  in  publica  administratione  non  esse  fas  quidquam  mutare  sine  certa  vocatione  ac  mandato  Dei:  sed  in  altero  errabant,  quod  admittere  nolebant  Christi  vocationem  nisi  edito  miraculo.  Neque  enim  id  in  prophetis  et  aliis  Dei  ministris  fuit  perpetuum,  ut  signa  ederent,  neque  Deus  ad  hanc  necessitatem  se  adstrinxit.  Ergo  in  signo  flagitando  perperam  Deo  legem  imponunt.  Quod  Iudaeos  evangelista  interrogasse  dicit,  hoc  nomine  procul  dubio  multitudinem  quae  illic  adstabat,  et  quasi  totum  ecclesiae  corpus