45:46  sed  quia  eius  vis  se  plenius  in  illis  exseruit,  quoties  ad  munus  suum  peragendum,  quasi  Dei  manu,  in  lucem  producti  sunt.  Itaque  notanda  est  duorum  membrorum  connexio,  quam  ponit  Lucas,  quod  repletus  sit  spiritu  sancto  et  prophetaverit.  Significat  enim  tunc  praeter  morem  divinitus  fuisse  afflatum,  ut  non  loqueretur  humanitus  quasi  privatus  quispiam,  sed  coelestem  tantum  doctrinam  proferret.  Sic  et  Paulus  prophetiam  cum  spiritu  coniungit,  primae  ad  Thessal.  5,  19,  Spiritum  nolite  exstinguere,  prophetias  ne  spernite:  ut  sciamus  doctrinae  contemptu  exstingui  spiritus  lucem.  Memorabilis  autem  fuit  haec  Dei  bonitas,  quod  Zachariae  non  tantum  reddita  fuit  loquendi  facultas,  qua  per  novem  menses  orbatus  fuerat,  sed  eius  lingua  facta  est  spiritus  sancti  organum.  68.  Benedictus  Dominus.  Orditur  Zacharias  a  gratiarum  actione,  sed  prophetico  spiritu  celebrat  impletam  redemptionem  olim  in  Christo  promissam,  unde  salus  et  felicitas  ecclesiae  pendebat.  Cur  Deum  Israel  nominet,  cuius  imperio  subest  totus  mundus,  ex  contextu  melius  patebit:  nempe  quia  semini  Abrahae  specialiter  promissus  fuerat  redemptor.  Quia  ergo  Deus  tantum  in  una  gente  foedus  suum  deposuerat,  de  quo  verba  facturus  est  Zacharias,  merito  nomen  gentis  illius  exprimit,  cui  proprie  vel  saltem  primo  loco  destinata  erat  salutis  gratia.  In  verbo  visitandi  subest  tacita  antithesis:  quoniam  a  miseris  Abrahae  filiis  Dei  facies  ad  tempus  fuerat  aversa.  Nam  eo  calamitatis  delapsi  erant,  et  tanta  malorum  congerie  obruti,  ut  nemo  a  Deo  respici  putaret.  Porro  haec  Dei  visitatio,  cuius  meminit  Zacharias,  tanquam  causa  et  principium  redemptionis  ponitur.  Quare  ita  resolve,  Deus  populum  suum  respexit,  ut  redimeret.  Quum  autem  captivos  esse  oporteat,  quos  Deus  redimit,  et  hoc  redemptionis  genus  spirituale  sit,  inde  colligimus,  ne  sanctos  quidem  patres  liberos  fuisse  a  peccati  iugo  et  mortis  tyrannide,  nisi  per  Christi  gratiam.  Sancto  enim  et  electo  Dei  populo  Christus  dicitur  missus  redemptor.  Sed  si  allata  tunc  demum  a  Christo  fuit  redemptio,  quum  carne  indutus  apparuit,  sequitur,  fideles,  qui  ante  eius  adventum  mortui  sunt,  tota  vita  peccati  et  mortis  fuisse  servos:  quod  valde  absurdum  esset.  Respondeo,  vim  et  effectum  huius  redemptionis,  quae  semel  in  Christo  fuit  exhibita,  saecuiis  omnibus  fuisse  communem.  69.  Erexit  cornu  salutis.  Hoc  est,  salvificam  potentiam.  Deiecto  enim  solio  Davidis  et  dissipato  populo,  spes  salutis  in  speciem  conciderat.  Porro  alludit  Zacharias  ad  prophetarum  vaticinia,  quibus  subita  in  rebus  deploratis  ac  perditis  instauratio  promittitur:  imo  haec  loquutio  ex  Psal.  132,  17  sumpta  est,  ubi  habetur,  Illic  oriri  faciam  cornu  Davidi,  paravi  lucernam  Christo  meo.  Quod  si  Deus  non  nisi  in  Christo  potentiam  suam  ad  nos  servan-