42:46  voit  contraint  il  faut  qu'il  face  ioug,  et  promet  (combien  que  ce  soit  contre  sa  volonte)  de  s'en  retourner  en  son  pays,  sans  plus  molester  le  roy  d'Egypte.  Nous  voions  donc  comme  ce  roy  Antiochus  estoit  d'un  esprit  servile,  c'est  a  dire  qu'il  n'y  avoit  point  une  nature  virile  en  luy,  qu'il  faisoit  le  chien  couchant  quand  il  se  voioit  surprins  par  force,  et  puis  estoit  il  eschappe,  on  ne  pouvoit  puis  apres  chevir  de  luy.  Ainsi  donc  l'ange  dit  ici,  qu'apres  qu'ils  ont  ainsi  parle  en  mensonge  l'un  avec  l'autre,  que  le  roy  de  midi,  c'est  a  dire  d'Egypte,  recouvrera  son  pays,  et  qu'alors  le  roy  d'Aquilon  Antiochus  Epiphanes,  viendra  avec  grosse  armee,  mais  ce  voiage  ne  sera  point  semblable  au  premier,  et  pourquoy?  Car  au  premier  voiage  il  avoit  usurpe  tout  le  royaume  d'Egypte,  mais  au  second  voiage  il  falloit  qu'il  s'en  retournast  confus,  il  estoit  gai  en  son  premier  retour,  qu'il  luy  sembloit  qu'il  avoit  obtenu  un  grand  pays,  mais  en  la  fin  il  faut  qu'il  s'en  retourne  confus,  qu'il  s'en  aille  comme  un  homme  qu'on  avoit  soufflete,  qu'a  la  simple  menace  d'un  citoien  de  Rome  il  ha  perdu  courage,  et  ha  este  vaincu.  Voila  donc  pourquoy  l'ange  dit,  que  le  second  voiage  ne  sera  pas  semblable  au  premier,  et  aussi  il  se  exprime  quand  il  parle  des  navires  de  Cithin,  le  mot  de  Cithin  se  rapporte  quelquesfois  a  Macedone,  et  dit  on  que  c'en  est  l'origine  et  la  source,  mais  il  s'entend  aussi  de  tous  ces  pays  qui  sont  vers  l'occident,  c'est  a  dire  tout  le  pays  d'Europe.  Or  ces  navires  la  vindrent  bien  de  Grece,  car  les  trois  capitaines  de  Rome  passerent  par  Grece  et  par  Rhodes,  et  de  la  vindrent  en  Egypte,  mais  tant  y  ha  qu'on  appele  navires  de  Cithin,  celles  qui  viennent  mesmes  du  coste  d'occident.  Et  nous  voions  mesmes  en  la  prophetie  de  Balaam  qu'il  en  est  fait  mention,  que  le  Seigneur  avoit  declare  ce  qui  adviendroit  au  dernier  temps  sur  son  peuple.  Ces  navires  donc  vindrent  et  le  firent  retourner,  voire,  en  deshonneur  et  en  confusion,  et  alors  (dit-il)  il  mettra  son  coeur  contre  le  sanctuaire  et  contre  le  temple  de  Dieu,  et  machinera  d  es  entreprises  sur  ceux  qui  auront  delaisse  l'alliance:  c'est  a  dire  aiant  complot  avec  les  apostats  de  Iudee,  que  ceux  la  feront  alliance  avec  luy,  a  fin  de  luy  donner  entree  et  acces  au  temple  de  Dieu.  Or  maintenant  venons  a  l'exposition  de  ces  histoires  ici,  car  ce  ne  seroit  rien  d'avoir  entendu  tout  ce  que  nous  avons  declare  par  ci  devant,  sinon  que  nous  sachions  l'usage,  et  la  fin  a  quoy  Dieu  ha  pretendu.  Il  est  vray  que  c'est  desia  beaucoup  quand  nous  verrons  que  ces  choses  se  conduisent  par  le  conseil  de  Dieu  et  par  sa  volonte,  que  nous  scavons  quo  ce  monde  ici  ne  se  remue  point  a  l'aventure,  mais  que  Dieu  guide  et  gouverne  le  tout,  et  aussi  que  nous  aurons  approbation  de  cette  verite