39:46  hunc  locum,  et  similes,  relinquunt  liberationem  populi  ab  exsilio  babylonico,  quasi  haec  vaticinia  nihil  ad  illud  tempus:  in  eo  falluntur.  Iudaei  autem  reiecto  Christo  subsistunt  in  terrena  illa  liberatione.  Atqui  prophetae,  quemadmodum  dixi,  incipiunt  a  reditu  populi  :  sed  statuunt  simul  Christum  in  medio,  ut  cognoscant  fideles  reditum  illum  fuisse  tenuem  duntaxat  gustum  plenae  gratiae,  quae  a  Christo  demum  exspectanda  erat.  Tunc  ergo  Deus  vere  plantavit  populum  suum.  Porro  quod  expulsi  postea  fuerunt  Iudaei  e  terra  Chanaam,  hoc  quidem  factum  est  eorum  ingratitudine,  et  fuit  illa  ultima  abdicatio:  interim  tamen  Deus  plantavit  illic  vitem  suam  usque  dum  Ierusalem  propagaretur,  et  haberet  suos  fines  in  ultimis  terrae  plagis.  Dicimur  autem  inseri  in  Christum  et  plantari,  quum  Deus  in  ecclesiam  suam  nos  adoptat  :  et  hinc  etiam  illud  Christi  (Mat.  15,  13),  Omnis  arbor  quam  non  plantaverit  pater  meus  eradicabitur.  Sciamus  ergo  plantatam  fuisse  ecclesiam  in  Iudaea,  quoniam  superstes  fuit  usque  ad  Christi  adventum.  Quoniam  autem  Christus  maceriem  diruit,  ut  nullum  iam  sit  discrimen  inter  Iudaeos  et  Graecos,  Deus  plantat  nos  in  terra  sancta,  dum  inserit  in  corpus  Christi.  Dicit,  In  veritate,  hoc  est,  fideliter,  ita  ut  nunquam  ipsos  evellat.  Et  addit,  In  toto  corde  meo,  et  in  tota  anima  mea.  Dura  quidem  est  loquutio,  quia  Deus  transfert  ad  se  humanos  affectus:  sed  necesse  est  ut  se  quodammodo  transfiguret,  quo  possit  a  nobis  intelligi.  Nisi  enim  balbutiat,  ubi  reperietur  tantum  acumen,  quod  ad  illam  immensam  altitudinem  sapientiae  eius  perveniat?  Quum  ergo  incomprehensibilia  sint  mysteria,  quibus  nos  dignatur,  necesse  est,  ut  sese  modulo  nostro  accommodet.  Ideo  per  totum  cor  et  per  totam  animam  intelligit  constantiam,  quae  semper  habebit  suum  effectum  usque  dum  fideles  ad  vitam  aeternam  perveniant.  Vocatur  totum  cor  integrum  in  homine,  quia  potest  esse  duplex:  hoc  Deo  et  eius  naturae  minime  potest  convenire,  verum  est.  Sed  quemadmodum  iam  dixi,  per  similitudinem  dicit  sese  facturum  ex  toto  corde,  quod  ita  perfecte  faciet  ut  nihil  desit  ad  omnes  salutis  numeros,  et  eodem  etiam  pertinet  veritas:  tametsi  quidam  hic  subtilius  philosophantur  in  hac  voce:  per  veritatem  intelligunt  firmitatem  promissionum.  Sed  scimus  ex  usu  linguae  hebraicae  veritatem  tantundem  valere  atque  aliquid  stabile  et  perpetuum.  Significat  ergo  plantationem  hanc  ita  fore  firmam,  ut  periculum  non  sit,  ne  unquam  populus  alio  transferatur,  quia  scilicet  viva  erit  radix:  quemadmodum  exposuimus  ecclesiam  fixam  fuisse  in  Iudaea,  donec  advenit  Christus,  qui  attulit  solidum  effectum  huius  plantationis,  quia  dum  in  ipsum  inserimur,  iam  possidemus  quodammodo  vitam  aeternam,  et  cives  sumus  coelorum.