35:46  plus  ardent.  Voila  des  choses  ou  il  ne  faut  point  de  glose,  et  n'y  a  rien  d'obscur  ni  difficile.  Et  ainsi  donc,  que  nous  ayons  tousiours  ceste  adressela,  quand  il  est  question  d'esprouver  une  doctrine:  et  nous  saurons  si  elle  est  droite,  ou  tortue:  si  elle  est  vraye  ou  fausse:  si  elle  est  pure  ou  s'il  y  a  de  la  corruption  et  du  meslinge,  selon  que  Dieu  nous  a  monstre  quelle  est  la  vraye  droiture.  Il  ne  faut  plus,  di-ie,  que  nous  soyons  ici  enveloppez  de  doutes:  seulement  ouvrons  les  yeux,  et  au  reste  prions  Dieu  qu'il  nous  guide  par  son  S.  Esprit:  d'autant  que  sans  cela  nous  vaguerons  tousiours,  et  ne  serons  point  suffisans  pour  discerner,  moins  que  de  petis  enfans  :  comme  aussi  S.  Paul  en  parle  (Eph.  1,  18),  qu'il  faut  bien  que  l'Esprit  de  Dieu  soit  comme  une  lampe  qui  nous  esclaire,  ou  iamais  nous  ne  comprendrons  que  c'est  des  secrets  de  Dieu:  ils  sont  spirituels,  et  de  nostre  nature  nous  ne  sommes  que  chair  et  terre,  nous  tendons  tousiours  en  bas.  Mais  si  Dieu  nous  illumine  par  son  S.  Esprit,  nous  iugeons  de  la  doctrine,  alors  nous  discernons  tellement  que  nous  ne  sommes  point  trompez  par  toutes  les  tentations  de  Satan:  et  combien  qu'il  nous  envoye  des  seducteurs,  qu'il  suscite  beaucoup  de  brouillons  qui  taschent  a  tout  pervertir,  cela  ne  pourra  rien  gaigner  contre  nous,  moyennant  que  l'Esprit  de  Dieu  soit  nostre  clarte  comme  nous  avons  desia  dit.  Et  au  reste,  combien  que  quelquefois  Dieu  parle  par  la  bouche  des  meschans  :  comme  il  est  dit,  que  le  royaume  de  nostre  Seigneur  Iesus  Christ  sera  avance  quelquefois  par  occasion,  que  les  hypocrites  ou  gens  qui  n'ont  nulle  crainte  de  Dieu,  qui  seront  menez  de  vaine  gloire  et  d'autres  vanitez,  pourront  servir  pour  un  temps,  et  Dieu  fera  valoir  leur  doctrine  au  salut  de  ses  eleus,  combien  que  ce  soit  a  leur  plus  grande  condamnation,  combien  donc  que  cela  puisse  advenir  quelquefois,  si  est-ce  que  l'ordinaire  n'est  pas  tel.  Car  si  Dieu  veut  que  nous  soyons  edifiez  en  luy,  quant  et  quant  il  nous  suscitera  gens  qui  parlent  de  coeur  et  de  zele:  et  mesmes  il  donnera  une  telle  marque  a  la  parole  qui  sort  de  leur  bouche,  qu'on  y  cognoistra  la  vertu  du  S.  Esprit:  comme  aussi  S.  Paul  en  parle.  Et  voila  pourquoy  ceux  qui  sont  en  office  d'annoncer  la  parole  de  Dieu,  doivent  tant  mieux  pratiquer  ce  que  i'ay  desia  dit,  c'est  a  savoir  d'estre  enseignez  devant  que  rien  mettre  en  avant,  tellement  que  le  coeur  parle  devant  la  bouche.  Pour  ce  faire,  qu'ils  prient  Dieu  qu'il  les  touche  au  vif,  tellement  qu'ils  ayent  sa  parole  bien  enracinee  en  leurs  ames,  a  ce  qu'ils  puissent  servir  a  leurs  prochains,  et  cognoissent  qu'ils  ne  se  iettent  point  a  la  volee,  mais  qu'ils  sont  poussez  du  S.  Esprit.  Voila  donc  ce  que  nous  avons  a  retenir  de  ce  passage.  Or  en  second  lieu  Eliu  proteste,  Qu'il  est