30:46  in  Dei  timore  ambulandum,  et  ab  eius  nutu  et  providentia  pendentium,  et  ab  eius  voluntate  et  mandatis  recedere  metuentium,  peccatumque  licet  in  nobis  habitans  odio  habentium  merces.  Quare  si  fideles  metus  aliquis  invaserit,  Deus  illos  vacillantes  corroborat,  et  adversus  quaevis  pericula  confirmat,  ut  licet  coelum,  terra,  elementa  omnia,  denique  res  omnes  creatae  coniurarent  adversus  ipsos  et  salutem  ipsorum,  tamen  imperterriti  maneant.  Conspicuum  istud  est  exemplo  Philistaeorum,  quos  Deus  non  tantum  terrore  aliquo,  sed  tanto  pavore  perculsit  ut  rationis  et  iudicii  sensum  omnem  amiserint,  quod  olim  etiam  Madianitis  contigerat.  Nam  in  libro  Iudicum  legimus,  Gedeone  cum  quadringentis  militibus  adversus  Madianitas  proelium  parante,  quorum  exercitus  erat  multis  hominum  millibus  instructissimus,  non  magno  labore  bellum  esse  confectum  :  quandoquidem  quum  solas  lampades  Israelitae  ostentarent,  et  tubae  clangorem  ederent,  suoque  loco  consisterent,  et  vociferarentur:  Gladius  Iehovae  et  Gedeonis!  Madianitae  mutuis  sese  vulneribus,  veluti  panico  furore  perciti,  confecerunt  Quemadmodum  igitur  tunc  temporis  Deus  ad  populi  sui  liberationem  tam  eximium  opus  edidit:  sic  etiam  de  Saule  iam  narratur,  non  magnis  viribus  opus  fuisse  ad  frangendos  hostes,  qui  sponte  fracti  sunt,  tanto  furore  perciti  ut  adversus  se  ipsos  impetum  facerent,  mutuisque  sese  vulneribus  conficerent:  quum  ea  esset  confusio  rerumque  perturbatio,  ut  quisque  adversus  fratrem  gladium  exsereret.  Ex  quibus  apparet,  Deum  non  tantum  eorum  animos  enervare  qui  prius  audacissimi  videbantur,  sed  etiam  in  furorem  et  amentiam  vertere.  Atque  ita  solet  Deus  hostes  adversus  suam  ecclesiam  coniuratos  ulcisci,  ut  sensum  illis  eripiat,  terroremque  panicum  immittat:  ut  quum  totis  viribus  impetum  in  miseros  facere  parati  fuerint,  et  nihil  nisi  cruentam  necem  spirarint,  sibique  magnos  triumphos  polliciti  fuerint,  victoriamque  cecinerint,  sibi  ipsis  perniciem  adferant,  et  in  se  ipsos  furore  immani  desaeviant.  Atque  hoc  praedixit  Dominus  per  prophetam  Zachariam,  nempe  se  effecturum,  ut  ferrum  incudem  percutiat,  hoc  est,  qui  pravis  consiliis  et  molitionibus  populum  suum  aggredientur  et  ultimum  exitium  minabuntur,  tanto  pavore  percellantur,  ut  vel  inviti  in  se  ipsos  ferrum  convertant.  Et  procul  dubio  mirabilis  est  hoc  tempore  et  miraculosa  modis  omnibus  ecclesiae  conservatio.  Nam  quis,  nisi  Deus,  eorum  furorem  cohibuit,  qui  caedem  nostram  et  sanguinem  sitiebant?  adeo  quidem  ut  evaginatis  iam  gladiis  impetum  facturi  fuerint,  et  ligna  caedere  ad  fideles  cremandos  parati?  Nae  videbatur  ecclesia  iamiam  ad  lanienam  rapienda.  Et  quidem  hostes  coniurati  arctissimo  inter  se  vinculo  conspirationis  tenebantur,  et  de  nobis  caesis  et  oppressis  triumphum  instituebant,