27:46  qu'il  n'y  ait  nul  fondement  sur  lequel  elle  s'appuye:  mais  en  vertu  de  la  promesse,  quand  il  est  dit:  Que  Dieu  benira  la  lignee  d'Abraham,  il  faut  qu'il  en  vienne  un  peuple,  comme  il  sera  remonstre  a  la  lecture  prochaine.  Voila  (di-ie)  une  election  de  Dieu,  quand  il  a  ainsi  discerne  la  lignee  d'Abraham  de  tout  le  reste  du  monde,  qu'il  a  la  fait  son  Eglise,  qu'il  veut  que  le  signe  de  sa  grace,  et  de  son  alliance  soit  la,  qu'il  veut  que  son  nom  y  soit  invoque,  qu'il  offre  les  promesses  de  salut  a  ceux  qui  sont  descendus  de  ceste  race  et  de  ceste  lignee:  le  Redempteur  qui  doit  estre  envoye  au  monde  leur  est  propose,  afin  qu'ils  soyent  recueillis  sous  luy.  Voila  (di-ie)  une  election  qui  appartient  en  general  a  tous  les  enfans  d'Abraham:  maisil  falloit  qu'une  telle  grace  fust  ratifiee  par  foy  en  partie,  et  en  d'aucuns  d'eux.  Car  nous  en  voyons  beaucoup  qui  en  ont  este  retranchez,  non  pas  qu'ils  ne  fussent  enfans  d'Abraham  selon  la  chair,  et  selon  le  monde  :  mais  ils  ne  sont  pas  enfans  spirituels,  et  devant  Dieu:  et  c'estoit  le  pricipal  (comme  sainct  Paul  le  monstre).  Ceux  donc  qui  ont  este  incredules,  qui  se  sont  desbordez,  et  qui  n'ont  point  embrasse  d'une  vraye  foy  la  promesse  qui  estoit  donnee  a  Abraham"  ceux-la  ont  este  privez  de  l'heritage:  ils  ont  bien  este  reputez  enfans:  mais  c'a  este  comme  Ismael,  qui  n'a  pas  este  legitime.  L'election  de  Dieu  donc,  qui  s'estendoit  a  tout  le  peuple,  n'a  pas  suffi:  mais  il  a  fallu  qu'un  chacun  en  fust  participant  en  son  endroict.  Et  comment  cela?  Par  foy:  Or  regardons  maintenant  dont  la  foy  procede  sinon  d'autant  que  Dieu  a  voulu  confermer  sa  grace  en  ceux  que  bon  luy  a  semble  ?  Il  a  donc  choisi  de  ce  peuple-la  ceux  qu'il  a  voulu,  et  leur  a  signe  sa  promesse  en  leurs  coeurs  par  son  sainct  Esprit,  tellement  qu'ils  en  ont  este  faits  participans  a  la  verite,  qu'elle  a  eu  son  effect,  et  sa  perfection  en  eux.  Voila  double  election  de  Dieu.  L'une  s'estend  a  tout  le  peuple:  pource  que  la  Circoncision  est  donnee  a  tous  indifferemment,  et  a  grands  et  a  petits  :  les  promesses  sont  aussi  communes  :  mais  cependant  il  faut  que  Dieu  adiouste  une  grace  seconde,  c'est  qu'il  touche  les  coeurs  de  ses  eleus,  de  ceux  qu'il  a  voulu  reserver,  et  ceux-la  viennent  a  luy,  et  fait  qu'ils  recoyvent  le  bien  qui  leur  est  offert.  Et  de  faict,  nous  voyons  que  la  plus  grande  multitude  de  ce  peuple  a  este  reiettee,  et  comme  bannie  de  la  grace  de  Dieu,  qu'il  n'en  a  seulement  demeure  qu'une  petite  semence:  et  non  seulement  pour  un  coup,  mais  apres  la  captivite  de  Babylone  :  comme  le  Prophete  Isaie  luy  avoit  predit  :  Encores  que  tu  fusses  grand  nombre,  et  que  ton  peuple  fust  comme  le  gravier  de  la  mer,  si  est-ce  qu'il  n'y  en  aura  qu'un  petit  residu  que  Dieu  sauve.  Car  les  hypocrites  abusoyent  faussement  de  la  promesse  de  Dieu,  quand  il  estoit  dit:  Que  le  peuple  seroit  en  telle  multitude  que  le  gravier  de  la  mer: