23:46  attigisset:  quum  poenam  in  longum  tempus  distulerit.  Nam  tunc  morti  addictus  fuit  Adam,  et  mors  regnum  suum  in  eo  inchoavit,  donec  remedium  afferret  superveniens  gratia.  18.  Non  est  bonum  ut  sit  Adam  solus.  Nunc  Dei  consilium  exponit  Moses  in  creanda  muliere:  nempe  ut  essent  homines  in  terra  qui  mutuam  inter  se  societatem  colerent.  Quanquam  dubitari  potest  an  ad  progeniem  debeat  extendi  haec  sententia:  simpliciter  enim  hoc  sonant  verba:  Quoniam  viro  non  expedit  esse  soli,  creanda  est  uxor  quae  sit  illi  adiutrix.  Ego  tamen  ita  accipio:  quod  Deus  a  primo  quidem  gradu  incipiat  humanae  societatis,  alios  tamen  velit  complecti,  suo  quemque  loco.  Principium  ergo  generale  est,  conditum  esse  hominem,  ut  sit  sociale  animal.  Iam  non  poterat  exstare  hominum  genus  sine  muliere:  adeoque  in  coniunctione  hominum  praecipue  eminet  sanctius  illud  vinculum,  quo  maritus  et  uxor  in  unum  corpus  unamque  animam  coalescunt:  quemadmodum  natura  ipsa  Platonem,  et  alios  philosophos  saniores  loqui  docuit.  Caeterum  quanquam  hoc  de  Adam  pronunciavit  Deus,  quod  illi  non  esset  utile  esse  soli:  non  tamen  ad  solam  eius  personam  restringo,  sed  potius  existimo  communem  esse  humanae  vocationis  regulam:  ut  sibi  quisque  dictum  accipere  debeat,  non  esse  bonam  solitudinem,  nisi  quem  Deus  velut  singulari  privilegio  exemit.  Putant  multi  suis  rationibus  conducere  caelibatum:  ideoque  ne  miseri  sint,  a  coniugio  abstinent.  Nec  solum  profani  homines  definierunt  beatam  esse  vitam  procul  uxore  degere:  sed  prior  Hieronymi  liber  contra  Iovinianum,  petulantibus  conviciis  refertus  est,  quibus  exosum  conatur  et  infame  reddere  sanctum  coniugium.  His  pravis  Satanae  suggestionibus  opponere  discant  fideles  hanc  Dei  sententiam,  qua  hominem  coniugali  vitae,  non  in  eius  exitium,  sed  in  salutem  destinat.  Faciam  ei  adiutorium.  Quaeri  potest  cur  non  plurali  numero  dictum  sit:  Faciamus,  ut  supra  in  creatione  viri.  Putant  quidam  hoc  modo  notari  utriusque  sexus  discrimen,  atque  ita  ostendi  quantum  vir  supra  mulierem  excellat.  Mihi  autem,  etsi  non  contraria  prorsus,  diversa  tamen  interpretatio  magis  arridet:  nempe  quum  in  persona  viri  creatum  fuerit  humanum  genus,  communem  totius  naturae  dignitatem  uno  elogio  promiscue  fuisse  ornatam,  ubi  dictum  est:  Faciamus  hominem:  nec  opus  fuisse  repeti  in  creanda  muliere,  quae  nihil  aliud  est  quam  viri  accessio.  Negari  certe  non  potest  quin  mulier  quoque,  licet  secundo  gradu,  ad  imaginem  Dei  creata  sit:  unde  sequitur,  quod  in  creatione  viri  dictum  fuit,  ad  sexum  muliebrem  pertinere.  Iam  quum  Deus  mulierem  viro  in  adiutorium  assignat,  non  tantum  uxoribus  regulam  vocationis  suae  praescribit,  ut  eas  ad  officium  instituat:  sed  pronunciat,  coniugium  viris  re  ipsa  fore  optimum  vitae  subsidium.