2:46  [CO  2.46]  horrendum  in  modum  tumultuoso  ventorum  impetu  concitare,  nunc  sedatis  undis,  pacatum  reddere.  Huc  pertinent  quae  passim  occurrunt  potentiae  Dei  elogia  ex  naturae  testimoniis,  praesertim  vero  in  libro  Iob  et  apud  Iesaiam;  quae  nunc  consulto  praetereo,  quia  commodiorem  alibi  locum  reperient,  ubi  ex  scripturis  de  mundi  creatione  disseram.  Tantum  nunc  attingere  volui,  exteris  et  domesticis  communem  hanc  esse  viam  quaerendi  Dei,  si  lineamenta  sequantur  quae  sursum  ac  deorsum  vivam  eius  effigiem  adumbrant.  Iam  ipsa  potentia  nos  ad  cogitandam  eius  aeternitatem  deducit:  quia  aeternum  esse,  et  a  se  ipso  principium  habere  necesse  est,  unde  omnia  trahunt  originem.  Porro  si  causa  quaeritur  qua  et  ad  creanda  haec  semel  omnia  inductus  sit,  et  nunc  ad  conservanda  moveatur,  solam  illi  suam  bonitatem  comperiemus  pro  causa  esse.  Quin  etiam  haec  si  una  sit,  plus  satis  tamen  sufficere  debet  ad  nos  in  amorem  eius  alliciendos:  quando  nulla  est  creatura,  ut  propheta  monet  (Psal.  145,  9),  in  quam  non  effusa  sit  eius  misericordia.  [Inst  1.5.7.]  In  secundo  quoque  genere  operum  eius,  quae  scilicet  praeter  ordinarium  naturae  cursum  eveniunt,  nihilo  obscuriora  se  proferunt  virtutum  eius  argumenta.  Nam  in  administranda  hominum  societate  ita  providentiam  suam  temperat,  ut  quum  sit  erga  omnes  innumeris  modis  benignus  ac  beneficus,  apertis  tamen  ac  quotidianis  indiciis,  suam  piis  clementiam,  improbis  ac  sceleratis  severitatem  declaret.  Non  enim  dubiae  sunt  quas  de  flagitiis  sumit  ultiones;  quemadmodum  non  obscure  tutorem,  ac  etiam  vindicem  se  innocentiae  esse  demonstrat,  dum  bonorum  vitam  sua  benedictione  prosperat,  necessitati  opitulatur,  dolores  lenit  ac  solatur,  calamitates  sublevat,  saluti  per  omnia  consulit.  Neque  vero  perpetuam  iustitiae  eius  regulam  obscurare  debet,  quod  improbos  et  sontes  ad  tempus  impunitos  saepiuscule  exsultare  sinit;  probos  autem  et  immerentes  multis  rebus  adversis  iactare,  impiorum  etiam  malitia  et  iniquitate  premi  sustinet.  Quin  potius  longe  diversa  cogitatio  subire  mentem  debet:  quando  in  flagitium  unum  manifesto  irae  indicio  animadvertit,  omnia  ipsum  odisse;  quando  multa  inulta  praetermittit,  aliud  fore  iudicium  quo  punienda  differuntur.  Similiter  misericordiae  suae  considerandae  quantam  materiam  nobis  suppeditat,  dum  saepius  miseros  peccatores  indefessa  tamen  benignitate  prosequitur,  donec  eorum  pravitatem  benefaciendo  fregerit,  plus  quam  paterna  indulgentia  ad  se  revocando?  [Inst  1.5.8.]  In  hunc  finem  propheta  (Psal.  107)  commemorans  in  rebus  desperatis  repente  et  mirabiliter  ac  praeter  spem  Deum  miseris  ac  fere  perditis  succurrere,  sive  per  deserta  vagantes  a  feris  protegat  et  tandem  reducat  in  viam,  sive  egentibus  ac  famelicis  victum  suppeditet,  sive  captivos  ex  tetris  foveis  et  ferreis