35:458  terme,  pour  dire  que  Dieu  a  heure  presente  confonde  et  destruise  tous  orgueilleux;  il  le  fera,  ouy  en  temps  opportun.  Et  ainsi  combien  que  les  orgueilleux  dominent,  et  qu'il  semble  que  Dieu  leur  laisse  faire  a  leur  teste,  et  que  mesmes  ils  se  rient  comme  s'il  n'avoit  point  la  puissance  de  les  reprimer:  si  estce  que  tousiours  il  a  cest  office  qui  lui  appartient,  pour  racler  de  ce  monde  les  orgueilleux  et  les  meschans  par  son  seul  regard.  Ouy:  mais,  comme  il  est  dit  en  l'Escriture,  quelquesfois  il  se  cache  des  fideles:  non  pas  que  iamais  il  les  mette  en  oubli,  et  qu'il  n'ait  point  le  soin  d'eux:  mais  il  ne  le  monstre  point  par  effect:  afin  d'esprouver  nostre  foi  et  patience.  Il  nous  semble  bien,  que  Dieu  nous  ait  oubliez,  quand  nous  sommes  en  quelque  danger,  et  mesmes  que  nous  sentons  les  coups,  bref,  que  nous  voyons  la  mort  presente:  et  que  cependant  nous  ne  voyons  point  que  Dieu  nous  vueille  tendre  la  main:  nous  crions  alors,  Helas!  Seigneur,  ou  et-tu?  comment  m'as-tu  oublie?  Voila  les  complaintes  que  nous  ferons  selon  nostre  apprehension  charnelle.  Ainsi  il  semble,  que  Dieu  ne  regarde  point  les  orgueilleux,  quand  il  les  laisse  ainsi  ietter  leur  venin,  et  qu'il  leur  souffre  tant  de  violences  et  d'enormitez  qu'ils  commettent.  Voire:  mais  pource  que  leur  saison  n'est  pas  encores  venue,  attendons  que  Dieu  ouvre  ses  yeux  sur  eux,  et  alors  ils  seront  abysmez.  Si  donc  pour  un  temps  ils  sont  supportez,  et  que  Dieu  dissimule:  sachons  que  le  temps  n'est  pas  encores  venu,  qu'il  les  regarde  en  son  ire  pour  les  exterminer,  comme  nous  avons  dit.  Or  ceste  doctrine  doit  servir  a  double  usage:  car  les  fideles  se  doivent  consoler:  et  combien  que  Dieu  du  premier  coup  ne  les  delivre  point  de  la  tyrannie  des  meschans,  toutes  fois  ils  ont  occasion  de  se  reposer  en  lui.  Pourquoi?  ce  n'est  pas  qu'il  ait  quitte  son  office,  voire  encores  qu'ils  s'eslevent  contre  lui,  mais  la  saison  n'est  pas  encores  venue:  il  les  engraisse,  comme  on  fera  un  boeuf:  mais  comme  on  sait  bien  quand  on  le  doit  tuer:  aussi  Dieu  sait  bien  le  iour  de  la  ruine  des  orgueilleux  et  de  tous  meschans.  Voila  donc  comme  en  premier  lieu  les  fideles  doivent  estre  patiens,  quand  ils  voyent  que  Dieu  dilaye  a  exterminer  les  arrogans,  et  les  meschans:  qu'il  faut  qu'ils  se  tiennent  cois,  iusques  a  ce  que  la  chose  se  face.  Cependant,  que  les  orgueilleux  pensent  a  eux  :  et  craignons  de  nous  flatter,  quand  Dieu  nous  espargne:  ne  pensons  point  estre  eschappez  de  sa  main  :  et  sous  ombre  qu'il  nous  supporte  et  qu'il  dissimule,  ne  cueillons  point  plus  grand'  audace  pour  attenter  ne  ceci  ne  cela.  Et  pourquoi?  Car  en  la  fin  nous  serons  regardez  de  lui:  et  alors  nos  fautes  seront  descouvertes  a  nostre  plus  grande  confusion.  Et  ainsi  donc  notons  bien,  qu'encores  qu'on  n'appercoive  point  les  iugemens  de  Dieu  a  l'oeil  chacun  iour,