32:458  Nons  demandons  a  Dieu  qu'il  ne  donne  point  gloire  a  nous  ny  a  nostre  nom,  nous  ne  pouvons  rien  alleguer  qu'il  soit  tenu  a  nous.  Mais  qu'il  glorifie  son  nom,  que  sa  bonte  soit  cogneue,  que  nous  luy  en  rendions  action  de  graces,  recognoissans  que  tout  le  bien  est  de  sa  seule  misericorde.  Et  que  nous  magnifions  sa  verite,  qu'il  nous  a  tenu  promesse  a  la  necessite.  Voicy  encore  une  autre  declaration  qui  s'ensuit  au  second  verset:  Pourquoy  diroyent  les  gens,  ou  est  maintenant  leur  Dieu?  Pourquoy:  pource  que  ton  nom  sera  blaspheme,  si  tu  ne  nous  secoure.  Les  infideles  se  moqueront  de  toy:  voudrois  tu  souffrir  que  ton  nom  fust  ainsi  mis  en  opprobre?  Il  faut  donc  que  tu  nous  ayde.  Les  iniques  prendront  occasion  de  te  blasphemer,  quand  nous  n'aurons  eu  nulle  ayde  de  toy.  Au  troisiesme  verset  il  y  a  comme  une  meditation,  c'est  a  dire,  une  sentence  qui  nous  est  donnee  a  fin  de  repousser  les  tentations,  qui  nous  pourroyent  venir  du  coste  des  infideles,  et  mesme  de  Satan  qui  est  encore  plus  subtil  que  tous  les  hommes  pour  nous  soliciter  a  deffiance.  Quand  nous  sommes  en  quelque  affliction,  le  diable  ne  tasche  sinon  de  nous  rompre  le  col:  s'il  advient  que  nous  invoquions  Dieu,  nous  sommes  troublez,  nous  ne  savons  a  quel  propos  nous  le  requerons.  Pour  ceste  cause  il  nous  est  icy  donne  un  bouclier.  Dieu  nous  arme.  Quand  nous  serons  assaillis  des  infideles,  qu'il  semblera  bien  advis,  c'est  fait  de  nous,  il  faut  prendre  ce  bouclier:  Nostre  Dieu  est  au  ciel,  il  fait  tout  ce  qu'il  luy  plait.  Il  est  dit  notamment,  nostre  Dieu.  S'il  y  avoit  un  Dieu  au  ciel  auquel  nous  n'eussions  point  d'accointance,  que  nous  serviroit  cela  ?  Pourtant  est  il  dit  Nostre  Dieu.  Cela  est  reciproque,  est  il  nostre  Dieu?  il  nous  advoue  donc  pour  ses  enfans,  ll  est  au  ciel.  Non  point  qu'il  soit  la  enclos,  l'escriture  n'entend  point  cela,  mais  c'est  pour  deux  raisons  qu'elle  parle  ainsi.  Pour  oster  toute  imagination  charnelle.  Nous  imaginons  des  choses  qui  ne  sont  point  convenables  a  sa  maieste,  pourtant  l'escriture  nous  envoye  au  ciel,  a  fin  que  nous  ne  presumions  de  rien  penser  de  luy,  que  nous  adorions  sa  maieste  en  crainte  et  en  reverence.  Le  second  est,  quand  il  est  dit  qu'il  est  au  ciel,  c'est  a  dire  qu'il  gouverne  tout.  Le  soleil,  la  lune,  les  estoilles  sont  bien  hautes,  mais  Dieu  est  par  dessus.  Si  un  prince  terrien  est  esleve  en  son  throne,  trois  ou  quatre  degrez  par  dessus  ses  subietz,  il  est  bien  hault,  mais  nostre  Dieu,  au  ciel,  au  ciel.  Il  a  domination  sur  tout  le  monde.  Il  tient  toutes  creatures  en  bride  pour  les  assubiettir  a  sa  volunte,  et  cependant  il  est  non  seulement  nostre  Dieu,  et  sauveur,  mais  il  n'est  point  le  Dieu  de  ceux  qui  nous  persecutent.  Aussi  c'est  icy  l'oraison  des  fideles  contre  les  iniques.  Dieu  bataille  pour  nous,  en  luy  nous  avons  nostre  deffense  :