25:458  non  desinant  Deo  reluctari:  sic  concidere,  ut  sua  ferocia  coelum  impetant.  Ergo  metus  qui  ad  cavendum  eos  stimulare  debuerat,  nihil  aliud  quam  praecipites  egit.  Verum  divinitus  territi  fuerunt  in  populi  gratiam,  quo  expeditior  esset  victoria:  et  animosiores  essent  Israelitae  quum  viderent  cum  hostibus  iam  fractis  et  semimortuis  fore  negotium,  atque  ita  eorum  infirmitati  pepercit  Deus,  ac  si  obstaculis  remotis  viam  patefecisset:  quia  plus  satis  alioqui  timidi  et  pigri  erant.  Summa  igitur  est:  priusquam  confligerent  hostes  fuisse  iam  prostratos,  quia  miraculi  fama  timorem  incusserat.  2.  Eo  tempore.  Videtur  maxime  absurdum  et  prodigio  simile,  circumcisionem  tamdiu  fuisse  intermissam:  praesertim  quia  quotidianis  documentis  admonitos  diligentius  solito  attendere  decebat  ad  colenda  pietatis  exercitia.  Symbolum  erat  adoptionis  unde  illis  obtigerat  liberatio.  Certe  dum  ad  extrema  redacti  sub  tyrannide  gemebant,  semper  circumciderunt  suos  liberos.  Et  scimus  quam  severe  minetur  Deus,  si  quis  octavum  diem  praetereat,  se  ultorem  fore.  Quod  si  neglecta  fuisset  observatio  in  Aegypto,  quia  tunc  videri  poterat  Dei  foedus  quodammodo  obsoletum,  magis  excusabilis  fuisset  segnities.  Nunc  vero  quum  de  integro  affulget  Dei  veritas  ad  stabiliendum  foedus,  quaenam  excusatio  nisi  vicissim  testentur  se  Dei  esse  populum?  Defensio  quam  afferunt  interpretes  prorsus  frivola  est.  Fateor  assidue  fuisse  in  procinctu,  semper  fuisse  incertos  quando  migrandum  foret.  Verum  perperam  inde  colligi  dico,  nullam  illis  fuisse  liberum  diem:  quia  crudele  fuisset  teneros  foetus  circumcidere,  dum  paulo  post  movenda  erant  castra.  Nihil  enim  tanti  esse  debuit,  ut  secure  contemnerent  quod  dictum  fuerat  Abrahae:  anima  quae  circumcisa  non  fuerit,  excidetur  e  populo  suo  (Gen.  17,  14).  Quod  si  periculum  esset  mortis,  optimum  et  unicum  erat  compendium,  recumbere  in  paternam  Dei  providentiam,  qui  certe  passus  non  esset,  infantibus  exitiale  esse  suum  praeceptum.  Denique  omissio  periculi  respectu  non  aliunde  nasci  poterat  quam  ex  diffidentia.  Quod  si  in  certum  discrimen  coniecti  essent  infantes,  parendum  nihilominus  fuit  Deo:  quia  obsignatio  foederis  qua  recipiebantur  in  ecclesiam,  centum  vitis  erat  pretiosior.  Nec  vero  tantam  ignaviam  tulisset  Moses,  nisi  alia  ratione  inductus.  Porro  in  re  dubia  coniicio,  non  a  primo  die  egressus  destitisse  a  circumcidendis  filiis:  sed  tantum  ex  quo  propter  suam  pervicaciam  retroacti  sunt.  Et  hac  ratione  tam  accurate  exprimitur  defectio  et  poena.  Neque  enim  dicitur,  rursus  fuisse  circumcisos,  quod  in  illa  peregrinatione  subinde  mutandus  esset  locus:  sed  quia  oportuit  effluere  quadraginta  annos,  donec  consumerentur  scelerati  illi  apostatae,  qui  se  promissa  haereditate  abdicaverant.  Haec  igitur  causa  notanda  est,  quod  filii  Israel  vagati  sint  per  deser-