6:457  SUPPLEX  EXHORTATIO  AD  INVICTISSIMUM  CAESAREM  CAROLUM  QUINTUM  ET  ILLUSTRISSIMOS  PRINCIPES  ALIOSQUE  ORDINES.  Indictus  est  abs  te  conventus  hic,  Caesar  Auguste,  in  quo  de  praesenti  ecclesiae  statu,  quem  miserrimum  et  prope  deploratum  omnes  cernimus,  in  melius  corrigendo  rationem  cum  Illustrissimis  imperii  Principibus  ordinibusque  aliis  ineas  tandem  atque  constituas.  Ad  hanc  itaque  consultationem  quando  nunc  considetis,  primum  abs  te,  Caesar,  simul  etiam  a  vobis,  Illustrissimi  Principes,,  et  ornatissimi  viri,  supplex  peto  atque  flagito,  quae  in  medium  proferam,  legere  et  diligenter  expendere  ne  gravemini.  Ea  est  magnitudo  causae  et  gravitas,  quae  vos  ad  audiendi  studium  incitare  debeat  Ego  vero  rem  ante  oculos  ita  vobis  proponam,  ut  statuere  non  difficulter  possitis,  quaenam  sint  vestrae  partes.  Quisquis  sim,  et  piae  doctrinae,  et  ecclesiae  patrocinium  me  hic  suscipere  profiteor.  Hoc  nomine  unum  saltem  istud  mereri  videor,  ne  mihi  audientiam  eousque  negetis,  dum  appareat,  falsone  eiusmodi  titulum  usurpem:  an  fideliter  praestem,  reque  ipsa  exhibeam,  quod  prae  me  fero.  Etsi  autem  tanto  oneri  nequaquam  parem  esse  me  scio  :  ubi  tamen  a  vobis  officii  mei  ratio  audita  fuerit,  minime  vereor,  ne  vel  socordiae,  vel  temeritatis  accuser,  quod  hanc  provinciam  subire  ausus  sum.  Duae  res  [pag.  4]  sunt,  quibus  commendare  quidquid  agunt,  vel  certe  defendere,  homines  fere  solent.  Nam  et  quod  honeste  pioque  studio  factum  est,  laude  dignum,  et  quod  publica  necessitate  expressum,  excusatione  saltem  non  indignum  arbitramur.  Earum  quum  utraque  mihi  constet,  non  dubito,  quae  vestra  est  aequitas,  quin  meum  hoc  consilium  approbare  facile  vobis  possim.  Nam  ubi  melius  aut  honestius,  ubi  etiam,  hoc  quidem  tempore,  in  re  magis  necessaria,  operam  mihi  collocare  liceat,  quam  si  Christi  ecclesiae,  cui  nihil  omnino  denegare  fas  est,  laboranti  nunc  graviter,  et  extremo  in  discrimine  agenti,  pro  mea  virili  adesse  coner?  Quanquam  de  me