5:456  ont  este  diminuees.  1)  Puis  doncq  que  nous  avons  le  corps,  il  nous  fault  delaisser  les  umbres;  car  si  nous  voulons  remettre  sus  les  ceremonies  qui  sont  abolies,  c'est  refaire  le  voile  du  temple  que  Iesus  Christ  a  rompu  par  sa  mort,  et  obscurcir  d'autant  la  clarte  de  son  Evangile.  Ainsi  nous  voyons  qu'une  telle  multitude  de  ceremonies  en  la  Messe  est  une  forme  de  Iuifverie,  plainement  contraire  a  la  Chrestiente.  Ie  n'entens  pas  de  [pag.  62]  reprouver  les  ceremonies,  lesquelles  servent  a  l'honnestete  et  ordre  publique,  et  augmentent  la  reverence  du  Sacrement,  moyennant  qu'elles  feussent  sobres  et  convenables.  Mais  un  tel  abisme  sans  fin  et  mesure  n'est  nullement  tolerable,  veu  mesme  qu'il  a  engendre  mille  superstitions,  et  a  mis  le  peuple  comme  en  stupidite,  sans  apporter  aucune  edification.  De  cela  on  peut  aussi  veoir  le  different  que  doibvent  avoir  avec  les  papistes  ceux  a  qui  Dieu  a  donne  intelligence  de  sa  verite.  Pour  le  premier,  ilz  ne  doubteront  pas  que  ce  ne  soit  un  sacrilege  abominable  de  reputer  que  la  Messe  soit  un  sacrifice,  par  lequel  la  remission  des  pechez  nous  soit  acquise,  ou  bien  que  le  Prestre  soit  comme  mediateur  pour  applicquer  le  merite  de  la  mort  et  passion  de  Christ  a  ceux  qui  achepteront  sa  Messe,  ou  y  assisteront,  ou  y  auront  devotion.  Mais  au  contraire,  ilz  auront  pour  conclud  que  la  mort  et  passion  du  Seigneur  est  le  Sacrifice  [pag.  63]  unicque  par  lequel  il  a  este  satisfaict  a  l'ire  de  Dieu,  et  iustice  perpetuelle  nous  a  este  acquise  :  et  apres,2)  que  le  Seigneur  Iesus  est  entre  au  Sanctuaire  celeste,  a  fin  d'apparoistre  la  pour  nous,  et  interceder  avec  la  vertu  de  son  sacrifice.  Au  reste  ilz  concederont  bien  que  le  fruict  d'icelle  mort  nous  est  communicque  en  la  Cene,  non  point  par  le  merite  de  l'oevre,  mais  a  cause  des  promesses  qui  nous  y  sont  donnees,  moyennant  que  nous  les  recevions  en  Foy.  Secondement,  ilz  ne  doibvent  nullement  accorder  que  le  pain  soit  transsubstantie  au  corps  de  Iesus  Christ,  ne  le  vin  en  son  sang:  mais  doibvent  persister  en  cela,  que  les  signes  visibles  retiennent  leur  vraye  substance  pour  nous  representer  la  verite  spirituelle  dont  nous  avons  parle.  Tiercement,  iacoit  qu'ilz  doibvent  tenir  pour  certain,  que  le  Seigneur  nous  donne  en  la  Cene  ce  qu'il  nous  y  figure,  et  par  ainsi  que  nous  y  recevons  vrayment  le  corps  et  le  sang  de  Iesus  Christ:  neantmoins  ilz  ne  le  cercheront  pas  comme  [pag.  64]  enclos  soubz  le  pain  ou  attache  localement  au  signe  visible,  tant  s'en  fault  qu'ilz  adorent  le  Sacrement:  mais  ilz  esleveront  plustost  leurs  entendemens  et  leurs  cueurs  en  hault,  tant  pour  recevoir  Iesus  Christ  que  pour  l'adorer.  1)  sont  diminuees,  1566  ss.  2)  et  apres,  1541;  pareillement,  1542  ss.