25:455  455  COMMENTARIUS  IN  IOSUE  CAP.  IV.  456  dicitur  populus  timuisse  Iosuam,  sicut  Mosen  timuerat,  multis  seditionibus  et  turbis  refelli,  quas  non  proterve  modo,  sed  furiose  contra  eum  excitaverant,  facilis  solutio  est,  non  comprehendi  totum  tempus  ex  quo  egressi  fuerant  ex  Aegypto,  sed  tantum  notari  illud,  quo  subacti  plagis  ac  mansuefacti,  Mosen  obedienter  colere  coeperant.  Tranquilla  enim  gubernatio  nunc  describitur,  ac  si  pervicaciam  veterem  exuissent:  praesertim  vero,  ubi  tumultuosis  patribus  mortuis  successit  melior  soboles.  Itaque  non  legimus  quidquam  fuisse  negotii  in  illis  regendis  ac  flectendis.  Quod  iam  exposui,  nunc  brevius  attingo.  Nam  dum  eos  hortatus  initio  fuit  Iosue  ad  obsequium,  se  fore  obsequentes  dixerunt,  sicut  ante  fuerant  Mosi.  16.  Praecepit  sacerdotibus.  Clarius  exprimitur  quam  sedatis  et  compositis  animis  ad  Dei  nutum  attenti  fuerint  sacerdotes:  quia  pedem  non  moverunt  donec  receptui  canere  iussit  Iosue.  Sicuti  autem  rarae  virtutis  fuit  ita  esse  morigeros  et  obsequentes:  ita  paterna  Dei  sollicitudo  in  eo  refulget,  quod  singulos  fere  progressus  dirigere  voce  sua  et  moderari  gravatus  non  est,  ne  qua  perplexitas  tardiores  eos  redderet.  Sequitur  luculentior  miraculi  confirmatio,  quod  simulac  ripam  transseenderunt,  Iordanis  more  suo  iterum  fluere  coepit.  Nisi  enim  rediisset  ad  pristinam  naturam,  et  quidem  repente:  multi  occultam  causam,  sed  fortuitam  mutationis  imaginati  essent.  Verum  ubi  Deus  minimis  temporum  articulis  potentiam  et  gratiam  suam  illustrat,  tollitur  omnis  dubitatio.  Quum  primum  madefacti  sunt  pedes  sacerdotum,  Iordanis  retrocessit:  nunc  eorum  discessu  liberum  cursum  recuperat,  idque  eodem  quo  in  ripam  venerunt  momento.  Siccum  enim  hic  accipitur  pro  ea  parte,  quae  exundatione  tecta  non  erat.  Ita  fluvius  quamvis  mutus,  optimus  fuit  praeco,  dum  plus  quam  sonora  voce  testatus  est  Deo  Israelis  subesse  coelum  et  terram.  19.  Populus  autem  ascendit  e  Iordane  decima  die  primi  mensis,  et  castrametati  sunt  in  Gilgal  ad  plagam  orientalem  Iericho.  20.  Ac  duodecim  lapides  quos  tulerant  ex  Iordane  statuit  Iosue  in  Gilgal.  21.  Et  loquutus  est  ad  filios  Israel,  dicendo:  Quum  interrogaverint  cras  filii  vestri  patres  suos  dicendo:  Quid  lapides  isti?  22.  Indicabitis  filiis  vestris  dicendo:  Per  aridam  transivit  Israel  Iordanem  istum:  23.  Quoniam  siccavit  Iehova  Deus  vester  aquas  Iordanis  a  facie  vestra  donec  transiretis:  quemadmodum  fecit  Iehova  Deus  vester  mari  Suph  quod  siccavit  a  facie  nostra  donec  transiremus.  25.  Ut  cognoscant  omnes  populi  terrae  manum  Iehovae,  quod  fortis  sit:  ut  timeatis  Iehovam  Deum  vestrum  cunctis  diebus.