37:454  nec  enim  fixi  sunt  et  stati  sacrificiorum  dies,  quibus  eundum  sit  Ierosolymam,  aut  quidquam  hic  vel  illic  offerendum:  sed  nostrae  oblationes,  feriae  et  laetitiae  continua  serie  velut  ex  die  in  diem  perpetuantur.  Interea  alludit  ad  veterem  sacrificiorum  morem,  ut  iam  saepius  usitatum  esse  prophetis  diximus.  Vult  ergo  Dominus  sibi  pura  sacrificia  quotidie  offerri,  non  statis  temporibus,  nec  qualia  sub  lege  olim  aut  hodie  apud  papistas,  qui  vel  stulte  incumbunt  suis  caeremoniis  ac  si  piacula  essent  scelerum,  vel  Christum  mactare  scelerate  audent:  sed  spiritualia,  ut  puro  et  sincero  cultu  veneremur  Deum  et  adoremus.  Quod  nonnulli  hinc  abrogationem  legis  et  veterum  caeremoniarum  probare  volunt,  mihi  satis  firmum  non  videtur.  Certum  quidem  est  legales  illos  ritus  sublatos  esse,  atque  hinc  colligi  potest:  sed  ad  probationem  huius  rei  aliis  firmioribus  locis  uti  vellem.  Subest  enim  hic  duntaxat  antithesis  inter  sabbata  et  festos  dies,  qui  celebrabantur  sub  lege,  et  sabbatum  quod  nobis  hodie  continuum  est.  24.  {Et  egredientur)  Non  sunt  hic  quaerendae  subtiles  et  argutae  interpretationes:  simpliciter  enim  admonet  eos  qui  in  ecclesiam  cooptati  fuerint,  circumcirca  horrendam  Dei  ultionem  visuros.  Quanquam  subest  inter  calamitatis  angustias  et  liberum  exitum  tacita  antithesis:  ac  si  diceret,  ex  tenebricoso  ergastulo,  ubi  constricti  erant,  prodituros  rursus  in  lucem.  Non  intelligit  has  strages  fore  in  coetu  fidelium  :  hoc  enim  felicitatem  ecclesiae  valde  imminueret,  in  qua  omnia  laetitiae  et  gaudii  documenta  a  Deo  eduntur:  sed  quemadmodum  prius  de  perpetua  gloria  loquutus  est,  qua  illustrabit  suos,  ita  nunc  denuntiat  poenas  quibus  afficiet  improbos,  ut  pii  magis  se  in  timore  Dei  contineant.  Quod  igne  cruciandos  dicit,  nuper  metaphoricam  esse  loquutionem  admonui:  idque  ex  membro  adiuncto  aperte  liquet.  Neque  enim  fingendi  sunt  e  terra  vermes  qui  infidelium  corda  arrodant.  Simplex  ergo  sensus  est,  impiis  malam  conscientiam  instar  carnificis  fore,  qui  absque  fine  eos  discruciet,  tormentumque  illis  paratum  esse  quod  alia  omnia  superet:  denique  dirum  et  horribilem  in  modum  pavidos  et  irrequietos  fore,  ac  si  vermis  cor  alicuius  hominis  roderet,  aut  exederet  ignis,  nec  tamen  ita  exesus  interiret.  Porro  quia  nunc  impii  summo  in  honore  habentur,  atque  pios  velut  ex  alto  despiciunt,  horrendam  mutationem  denuntiat:  quia  cum  extremo  cruciatu  ignominiam  quoque  summam  sustinebunt:  sicuti  par  et  aequum  est,  quibus  contemptui  et  ludibrio  fuit  Dei  gloria,  eos  probris  omnibus  obrutos  angelis  et  toti  mundo  abominabiles  reddi.