54:452  apres  qu'ils  auront  este  enseignez,  si  les  faut-il  exhorter,  qu'il  faut  que  ceste  aide  soit  adioustee,  c'est  ascavoir  qu'on  les  pieque,  et  qu'on  leur  monstre  ce  qui  est  de  faire.  Combien  que  ce  mot  emporte  Consoler  quelque  fois:  mais  sainct  Paul  a  voulu  dire  qu'il  ne  suffit  pas  que  nous  entendions  ce  qui  est  bon,  mais  il  faut  que  nous  y  soyons  incitez.  Or  par  cela  nous  sommes  advertis  quand  nous  venons  au  sermon,  que  nous  ne  devons  point  trouver  estrange  si  on  nous  solicite  de  venir  a  Dieu.  Car  il  y  en  a  d'aucuns  qui  voudroyent  qu'on  feist  des  lecons  froides,  et  quasi  toutes  mortes,  et  que  seulement  on  leiist  ce  qui  est  contenu  en  l'Escriture  saincte.  Mais  quoy?  Dieu  scait  mieux  que  nous  ce  qui  nous  est  expedient  pour  nostre  salut.  Et  ainsi  venons  ouyr  la  parole  de  Dieu,  non  seulement  pour  estre  instruits  de  ce  qui  est  bon,  mais  aussi  pour  y  estre  poussez,  comme  il  en  est  besoin,  et  que  nostre  paresse  et  nostre  infirmite  le  requiert.  Or  cependant  advisons  d'estre  de  ce  nombre  dont  parle  sainct  Paul,  si  nous  voulons  que  la  parole  de  Dieu  nous  serve  d'instruction.  Car  autrement  nous  fermerons  la  porte'  a  Dieu,  tellement  qu'il  ne  nous  pourra  estre  docteur,  ni  faire  son  office  envers  nous  quand  nous  luy  serons  rebelles,  que  nous  serons  sauvages,  que  nous  ne  pourrons  recevoir  son  ioug  en  toute  obeissance.  Yoila  (di-ie)  comme  il  nous  en  faut  faire  pour  avoir  Dieu  nostre  docteur.  Et  ainsi,  voulons-nous  estre  capables  de  bonne  doctrine,  et  qui  profite?  Que  nous  soyons  de  ce  rang  des  agneaux  et  brebis  qui  escoutent  volontiers  leur  Pasteur,  et  que  nous  ne  soyons  point  trop  difficiles  a  manier,  et  mesmes  a  suyvre  tout  doucement  les  exhortations  qui  nous  seront  faites  quand  on  nous  picquera.  Mais  notons  aussi  qu'il  faut  redarguer  les  contredisans.  Car  celuy  qui  ha  la  charge  d'enseigner  l'Eglise,  doit  avoir  ceste  prudence,  de  regarder  a  tous  ceux  qui  se  laissent  gouverner  sans  contredit,  et  que  nostre  Seigneur  Iesus  regne  sans  aucune  rebellion;  mais  s'il  y  a  quelque  contredit,  il  faut  venir  a  ce  remede  dont  use  S.  Paul.  Si  un  homme  qui  anonce  l'Evangile  n'ha  ce  regard,  il  est  certain  qu'il  ne  profitera  gueres.  Et  ainsi  retenons  bien  que  quand  le  ministre  monte  en  chaire,  il  doit  tousiours  en  premier  lieu  tendre  a  ce  but,  d'attirer  tout  le  monde  en  l'obeissance  de  Dieu  :  comme  aussi  S.  Paul  en  traitte  ailleurs:  quand  il  parle  du  glaive  spirituel  qui  est  pour  reietter  tout  sens  humain,  et  pour  abbatre  toute  hautesse  qui  s'eleve  contre  Iesus  Christ,  et  que  la  vengence  est  appareillee  contre  tous  contredisans,  il  dit,  Yoire  quand  nostre  obeissance  sera  accomplie:  car  c'est  la  principale  fin  que  nous  devons  avoir  quand  nous  preschons  l'Evangile,  d'attirer  en  l'Eglise  tous  ceux  qui  se  laissent  doucement  gouverner.  Yoila  pour  un  item.