8:450  Dieu  seul  qui  distribue  selon  son  bon  plaisir  les  peuples  en  leurs  ordres,  et  discerne  les  uns  d'avec  les  autres,  selon  que  bon  luy  semble:  attendu  qu'il  y  a  une  pareille  condition  en  tous  selon  leur  nature.  L'enroulement  duquel  il  est  yci  parle  s'entend  de  la  vocation  par  laquelle  Dieu  declare  lesquels  sont  ceulx  qu'il  a  esleus.  Car  combien  qu'il  ait  escript  ses  enfans  au  livre  de  vie  devant  la  creation  du  monde,  toutesfois  il  les  couche  solennellement  en  son  registre  quand  il  leur  donne  la  marque  de  son  adoption,  les  appelant  a  sa  verite,  et  les  renouvelant  par  son  Esprit.  7.  Et  tant  les  chantres  que  les  ioueurs  de  fleutes.  Toutes  mes  fontaines  sont  en  toy.  La  briefvete  de  ceste  sentence  est  en  partie  cause  de  la  rendre  obscure,  et  en  partie  aussi  un  mot  duquel  la  signification  est  doubteuse.  Tous  les  expositeurs  accordent  bien  en  cela,  que  le  mot  de  Fontaine  se  prend  yci  par  similitude:  mais  les  uns  le  rapportent  aux  [f.  82]  affections  du  cueur,  les  autres  aux  pensees.  Il  y  en  a  qui  le  translatent  Veines,  ou  melodies,  desquels  i'approuveroye  bien  l'opinion,  si  l'usage  de  la  langue  Hebraique  le  povoit  souffrir:  mais  pource  que  cela  seroit  un  peu  contrainct,  ie  me  tien  a  ce  qui  est  le  plus  propre  et  naturel,  c'est  que  le  Prophete  par  ce  mot  signifie  les  yeulx  ou  le  regard,  comme  s'il  disoit:  I'auray  tousiours  ma  veue  fichee  et  arrestee  en  toy.  Car  mesme  la  racine  de  ce  mot  signifie  Oeil  en  Hebrieu.  Il  reste  de  veoir  qu'il  veult  dire  en  l'autre  partie:  Tant  les  chantres  que  les  ioueurs  de  fleutes.  C'est  bien  une  sentence  rompue,  mais  cela  n'empesche  pas  qu'on  n'en  puisse  aiseement  recueillir  le  sens,  a  scavoir,  qu'il  y  aura  si  ample  argument  de  ioye  dans  l'Eglise  apres  qu'elle  sera  restauree,  que  les  louanges  de  Dieu  y  resonneront  sans  cesse,  tant  de  voix  que  d'instrumens  de  musique.  Il  conferme  donc  ce  qu'il  avoit  dict  de  ceste  reparation  tant  magnifique  de  Sion  et  de  Ierusalem,  en  demonstrant  que  pour  la  grande  felicite  qui  y  sera,  on  aura  occasion  de  s'esiouir,  chanter  et  louer  Dieu  a  iamais.  Cependant  il  monstre  aussi  a  quelle  fin  et  intention  Dieu  enrichit  si  liberalement  son  Eglise  de  ses  dons  et  graces,  a  scavoir,  a  ce  que  les  fideles  monstrent  par  hymnes,  louanges  et  cantiques,  qu'ils  ne  sont  point  ingras  envers  luy.  D'autrepart,  nous  avons  a  noter  le  zele,  l'amour,  solicitude  et  affection  du  Prophete  envers  l'Eglise.  Car  il  en  rend  tesmoignage  pour  nous  exhorter  tous  a  suyvre  son  exemple,  selon  qu'il  est  dict  en  l'autre  passage:  Que  ma  dextre  soit  mise  en  oubli,  si  Ierusalem  n'est  le  chef  de  ma  ioye  (Pseaulme  29