37:450  fierint  simul  unum  corpus.  Videre  gloriam  Domini  nihil  aliud  est  quam  ea  frui  gratia  qua  Iudaeos  dignatus  erat.  Hoc  enim  speciale  illius  gentis  privilegium  fuit,  ut  gloriam  Dei  intuerentur,  atque  eius  praesentiae  signa  haberent.  Nunc  gentes,  quae  his  bonis  caruerant,  visuras  dicit  et  conspecturas  illam  gloriam  :  quia  Dominus  sese  omnibus  patefaciet  sine  exceptione.  19.  (Et  ponam.)  Hoc  dupliciter  accipi  potest,  vel  quod  Deus  aliquod  signum  porrigat:  vel  aliquo  symbolo  aut  tessera  suos  insigniat  ut  salvi  evadant.  Prior  expositio  magis  recepta  est:  sed  nonnulli  in  ea  pueriliter  argutantur  de  signo  crucis:  alii  vero  ad  praedicationem  evangelii  referunt:  utrique  meo  iudicio  hallucinantur.  Videtur  enim  potius  alludere  ad  id  quod  Moses  scribit  factum  esse  in  exitu  et  liberatione  populi:  atque  in  Apocalypsi  refertur:  Quotquot  signati  fuerint  a  Domino  salvos  fore,  etiam  quum  ira  eius  grassabitur  per  universum  orbem:  quemadmodum  ii  quorum  signatae  erant  postes  in  Aegypto  salvi  evaserunt.  Atque  ita  ostendit  neminem  effugere  posse  iram  Dei,  praeter  electos,  quibus  signum  et  notam  Dominus  impresserit.  In  summa,  propheta  amplificat  quod  iam  dictum  est  de  gravi  et  dira  ultione  quam  Deus  sumpturus  erat  de  impiis.  Omnes  enim  perituri  essent  promiscue,  nisi  Dominus  aliquos  nota  sua  insigniret.  A  communi  igitur  exitio  totius  gentis  exiguum  aliquem  numerum  se  reservaturum  dicit.  Atque  hic  verus  prophetae  sensus  est:  quemadmodum  etiam  alibi  dixerat  se  quasdam  reliquias  velut  a  communi  incendio  erepturum.  Ex  hac  residua  manu  dicit  quosdam  fore  sibi  praecones  ad  celebrandum  in  gentibus  nomen  suum:  sicuti  videmus  paucorum  opera  longe  lateque  promulgatam  fuisse  salutis  doctrinam.  (Tharsis.)  Hoc  nomine  Ciliciam  designat:  atque  totum  littus  maris  mediterranei  Iudaeae  oppositum  comprehendit.  Alii  Africam  et  Cappadociam  significari  putant:  sed  priorem  sententiam  magis  amplector.  Per  Lud  nonnulli  Lybiam,  et  alii  Asiam  minorem  intelligunt.  Per  eos  qui  trahunt  arcu  Parthos:  quoniam  experti  erant  in  arte  sagittandi.  Per  Thubal  et  Iavan  Italiam  et  Graeciam:  per  insulas  vero,  ignotas  regiones  designat.  Nam  insularum  nomine  quidquid  ultra  mare  erat  Iudaei  significabant:  ut  iam  antea  saepius  dictum  est.  Quae  non  audierunt.  Significat  spargendam  esse  notitiam  Dei  per  universum  orbem:  nam  Graeci,  Itali,  Parthi,  Cilices,  aliique  populi  nihil  de  pura  religione  et  sincero  Dei  cultu  audierant:  atque  universus  orbis  profundissimis  ignorantiae  tenebris  demersus  erat.  Notam  ergo  ubique  terrarum  fore  gloriam  Dei  promittit.  Subest  autem  emphasis  in  nomine  gentium:  quia  tunc  Dominus  uni  tantum  populo  notus  erat,  nunc  omnibus  se  patefecit.  29