39:45  45  IN  IEREMIAM.  CAP.  XXXII.  46  synecdochicos  exponi:  quanquam,  ut  ante  dictum  fuit,  scriptura  ubi  de  timore  Dei  loquitur  saepe  fidem  coniungit,  quia  non  potest  etiam  aliter  Deus  timeri,  ut  dicitur  Psalmo  130  (v.  4)  nisi  quum  gustamus  eius  bonitatem,  Apud  te  est  propitiatio,  ut  timearis:  nulla  enim  esset  Dei  reverentia,  nisi  praecederet  cognitio  paterni  eius  favoris.  Nunc  sequitur,  41.  Et  laetabor  super  ipsos  benefaciendo  ipsis,  et  plantabo  eos  in  terra  hac,  in  veritate  (id  est,  fideliter),  in  toto  corde  meo,  et  in  tota  anima  mea.  Quum  dicit  Deus  se  voluptatem  capturum  ex  sua  erga  populum  beneficentia,  iterum  induit  hominis  personam.  Patres  enim  laetantur  quum  possunt  filiis  suis  benefacere.  Deus  ergo,  quia  non  poterat  aliter  exprimi  patris  amor,  quo  populum  suum  amplectitur,  usus  est  hac  similitudine.  Deinde  notanda  est  etiam  antithesis,  quod  scilicet  Deus  laetatus  fuerat  quum  poenas  exigeret  de  populi  sceleribus:  Deum  enim  oblectat  suum  iudicium,  sicut  misericordia.  Deus  ergo  ad  tempus  laetatus  est,  quum  poenas  exigeret  de  populo:  quia  ut  rectum  est  eius  iudicium,  ita  etiam  ipsum  oblectat.  Nunc  autem  dicit  se  ita  fore  paterno  affectu,  ut  voluptatem  capiat  ex  sua  beneficentia.  Adiungit,  Plantabo  eos  in  terra  hac.  Plantaverat  quidem  ipsos  quum  per  manum  Iosuae  tradita  illis  fuisset  terrae  possessio,  quemadmodum  Psalmo  etiam  80  (v.  9)  hoc  idem  verbum  ponitur,  quod  scilicet  vitem  suam  traduxerit  Deus  ex  Aegypto,  et  plantaverit  in  haereditate  promissa:  sed  postea  evulsus  fuit  populus.  Ideo  prior  terrae  possessio  usque  ad  tempus  exsilii  non  proprie  fuit  plantatio:  quia  tunc  populus  non  egit  firmas  radices.  Deus  ergo  hic  novum  aliquid  et  insolitum  promittit  quum  de  plantatione  loquitur.  Nec  dubium  est  quin  semper  notetur  perpetuitas,  cuius  nuper  facta  fuit  mentio.  Pendet  enim  haec  plantatio  populi  a  foedere:  atqui  foedus  non  est  temporale,  ut  fuerat  ante  exsilium,  sed  perpetuae  durationis.  Nunc  ergo  tenemus  quid  significet  propheta  quum  plantationi  comparat  restitutionem  populi,  postquam  reversus  fuerit  ab  exsilio.  Scimus  quidem  populum  ab  eo  tempore  non  fuisse  expulsum,  et  semper  templum  stetisse,  quamvis  multis  miseriis  fuerint  oppressi  fideles,  sed  plantationis  solum  figura  fuit:  ideoque  necesse  est  transire  usque  ad  Christum,  si  volumus  habere  complementum  huius  promissionis.  Initium,  ut  alibi  diximus,  et  saepe  hoc  repetere  cogor,  sumendum  est  ab  ipso  reditu:  sed  non  debet  excludi  Christus  ab  ea  liberatione,  quae  tantum  fuit  instar  aurorae,  antequam  ipse  qui  est  sol  iustitiae,  plenum  suum  fulgorem  ostenderet.  Christiani  quum  exponunt