3:45  45  LIVRE  I.  CHAPITRE  II.  III.  46  biens  qu'il  nous  fait.  Car  iusques  à  ce  que  les  hommes  ayent  ceci  bien  imprimé  au  coeur,  qu'ils  doivent  tout  à  Dieu,  qu'ils  sont  tendrement  nourris  sous  son  soin  paternel:  brief  qu'ils  le  tiennent  autheur  de  tout  bien,  en  sorte  qu'ils  n'appetent  rien  que  luy,  iamais  ils  ne  s'assuiettiront  d'une  franche  devotion  à  luy:  qui  plus  est,  s'ils  ne  mettent  en  luy  toute  leur  felicité,  iamais  ne  s'y  adonneront  en  verité  et  rondeur.  2.  Parquoy  ceux  qui  s'appliquent  à  decider  ceste  question,  assavoir  que  c'est  que  Dieu,  ne  font  que  se  iouer  en  speculations  frivoles,  veu  que  plustost  il  nous  est  expedient  de  savoir  quel  il  est,  et  ce  qui  convient  à  sa  nature.  Car  quel  profit  y  aura-il  de  confesser  avec  les  Epicuriens,  qu'il  y  a  quelque  Dieu,  lequel  s'estant  deschargé  du  soin  de  gouverner  le  monde,  prenne  plaisir  en  oisiveté?  Mesmes  de  quoy  servira-il  de  cognoistre  un  Dieu,  avec  lequel  nous  n'ayons  que  faire?  Plustost  la  cognoissance  que  nous  avons  de  luy,  doit  en  premier  lieu  nous  instruire  à  le  craindre  et  reverer:  puis  nous  enseigner  et  conduire  à  chercher  de  luy  tous  biens,  et  luy  en  rendre  la  louange.  Et  de  fait,  comment  Dieu  nous  peutil  venir  en  pensée,  que  nous  ne  pensions  quant  et  quant,  veu  que  nous  sommes  sa  facture,  que  de  droit  naturel  et  de  creation  nous  sommes  subiets  à  son  empire,  que  nostre  vie  luy  est  deue,  que  tout  ce  que  nous  entreprenons  et  faisons  se  doit  rapporter  à  luy?  Puis  qu'ainsi  est,  il  s'ensuit  pour  certain  que  nostre  vie  est  mal-heureusement  corrompue,  sinon  que  nous  l'ordonnions  à  son  service:  veu  que  c'est  bien  raison  que  sa  seule  volonté  nous  serve  de  loy.  D'autre  part  il  est  impossible  d'appercevoir  clairement  quel  est  Dieu,  sans  le  cognoistre  source  et  origine  de  tous  biens:  dont  les  hommes  seroyent  incitez  d'adherer  à  luy  et  y  mettre  leur  fiance,  sinon  que  leur  propre  malice  les  destournast  de  s'enquerir  de  ce  qui  est  bon  et  droit.  Car  pour  le  premier,  l'ame  bien  reiglée  ne  se  forge  point  un  Dieu  tel  quel:  mais  regarde  celuy  qui  est  vray  Dieu  et  unique.  Puis  apres  elle  n'imagine  point  de  luy  ce  que  bon  luy  semble  mais  elle  se  contente  de  l'avoir  tel  que  luy-mesme  se  manifeste,  et  se  garde  soigneusement  de  ne  point  sortir  par  une  folle  audace  et  temerité  hors  de  ce  qu'il  a  declairé,  pour  vaguer  çà  ne  là.  Ayant  ainsi  cogneu  Dieu,  pource  qu'elle  sait  qu'il  gouverne  tout,  elle  se  confie  d'estre  en  la  garde  et  protection  d'iceluy,  et  ainsi  elle  se  remet  du  tout  en  sa  garde:  pource  qu'elle  le  cognoit  autheur  de  tous  biens,  si  tost