47:449  449  CAPUT  XXI.  450  est:  sed  tantisper  cessabat,  dum  indueretur  nova  virtute.  Nondum  enim  ad  exercendum  docendi  munus  prodire  iussus  fuerat,  sed  tantum  admonitus  de  futura  vocatione,  ut  ipse  et  reliqui  intelligerent,  non  frustra  se  ab  initio  fuisse  electos.  Interea  agunt  quod  solebant,  et  quod  privatos  homines  decebat.  Paulus  quidem  in  medio  praedicationis  cursu  victum  manibus  quaerebat,  sed  diversa  fuit  illa  ratio:  sic  enim  partiebatur  tempus,  ne  labores  manuarii  eum  a  docendo  abstraherent.  Petrus  autem  et  eius  comites,  quia  ab  omni  publica  functione  otium  est,  libere  se  totos  piscationi  impendunt.  Illa  nocte  nihil  ceperunt.  Tota  nocte  passus  est  Deus,  frustra  eos  satagere  ad  illustrandam  miraculi  fidem.  Nam  si  quid  coepissent,  non  ita  clare  in  continuo  successu  innotuisset  Christi  virtus,  sed  dum  tota  nocte  frustrati  subito  ingenti  captura  potiuntur,  iusta  illis  datur  occasio  agnoscendae  Domini  gratiae.  Eodem  etiam  modo  fideles  saepe  exercet  Deus  quo  suam  illis  benedictionem  commendet.  Si  prospere  semper  succederet,  quoties  labori  manum  admovemus,  nemo  fere  Dei  benedictioni  acceptum  ferret,  quod  haberet  operae  suae  pretium,  iactarent  omnes  suam  industriam  et  manus  suas  oscularentur.  Sed  ubi  interdum  nullo  profectu  se  fatigant  ac  macerant,  si  quis  postea  melior  fructus  contingit,  coguntur  aliquid  extraordinarium  agnoscere.  Ita  fit  ut  laudem  prosperi  successus  Dei  gratiae  tribuere  incipiant.  6.  Mittite  in  dexteram  partem.  Non  imperat  Christus  pro  iure  ac  potestate  magistri  ac  domini,  sed  consulit  ut  unus  quispiam  e  populo.  Discipuli  autem  consilii  inopes  homini  quamvis  ignoto  facile  obtemperant.  Si  ante  primum  iactum  tale  aliquid  audissent,  non  fuissent  tam  prompti  ad  parendum.  Quod  ideo  moneo,  ne  quis  miretur  ita  fuisse  morigeros,  quum  iam  longa  et  irrita  fatigatione  essent  domiti.  Quanquam  non  vulgare  hoc  fuit  tolerantiae  documentum,  quod  laborem,  in  quo  se  infeliciter  exercuerant  tota  nocte,  post  exortam  diei  lucem  continuant.  Et  certe  ut  Dei  benedictioni  locus  detur,  constanter  exspectanda  est  :  nihil  enim  magis  praeposterum,  quam  manum  statim  ab  opera  retrahere  nisi  fructuosa  appareat.  Serio  laborasse  discipulos,  testis  est  Petri  nuditas.  Atqui  non  detrectant  periculum  facere  novi  iactus,  ne  quam  occasionem  negligant.  Quod  tamen  obsequuntur  Christi  praecepto,  fidei  adscribi  non  potest:  audiunt  enim  tanquam  ignotum  hominem.  Nunc  si  nobis  molesta  est  nostra  vocatio,  quia  videtur  esse  sterilis  labor  quem  suscipimus,  ubi  tamen  nos  Dominus  ad  pergendi  constantiam  hortatur,  colligere  animos  decet:  non  deerit  tandem  felix  eventus,  sed  opportuno  tempore.  7.  Dicit  ergo  discipulus  ille.  Suo  exemplo  docet  evangelista,  quoties  nobis  praeter  spem  bene  succedit,  tollendas  esse  ad  Deum  mentes:  quia  venire  Calvini  opera.  Vol.  XLVII.