54:448  Dieu  sans  aucune  doute,  et  d'avoir  nostre  recours  a  luy:  que  nous  scachions  que  c'est  de  patience  en  affliction  et  en  adversitez,  que  c'est  de  nous  resiouir  au  milieu  des  miseres  de  la  vie  presente:  que  nous  scachions  que  c'est  de  la  vie  celeste,  et  comme  il  nous  faut  passer  par  ce  monde.  Yoila  donc  les  deux  choses  qui  sont  requises  notamment.  Or  sainct  Paul  adiouste  la  constance,  Que  le  Pasteur  (dit-il)  embrasse  tellement  la  doctrine  pure,  et  qu'il  la  tiene  si  bien  serree,  que  iamais  on  ne  luy  puisse  escourre  d'entre  les  bras  ce  qu'il  aura  une  fois  receu  de  Dieu.  Voila  encores  une  vertu  bien  necessaire.  Car  si  les  fideles,  iusques  aux  plus  rudes  et  idiots,  doyvent  estre  fermes  en  la  foy,  et  ne  point  estre  comme  roseaux  branlans  a  tous  vents,  que  sera-ce  de  ceux  qui  doyvent  monstrer  l'exemple  a  tout  le  reste?  Sainct  Paul  au  4.  chapitre  des  Ephesiens,  dit  que  si  nous  sommes  enseignez  en  l'Evangile,  nous  ne  serons  point  comme  petis  enfans,  tellement  qu'on  nous  face  accroire  que  vessies  sont  nuees:  mais  que  nous  recevions  la  verite  de  Dieu  pour  estre  resolus  en  nous,  pour  demeurer  la  fermes,  qu'on  ne  nous  meine  point  a  la  pipee  (comme  il  use  de  ce  mot-la),  mais  que  nous  puissions  resister  a  toutes  tentations  et  astuces  de  Satan,  et  de  tous  ses  supposts.  La  il  n'est  point  question  seulement  des  Pasteurs,  mais  de  tous  fideles  en  general,  depuis  le  plus  grand  iusques  aux  plus  petis.  Et  que  sera-ce  donc  de  ceux  qui  doyvent  estre  comme  les  piliers  pour  soustenir  tout  le  reste  du  peuple?  Sainct  Iehan  dit  que  la  foy  doit  estre  nostre  victoire  par  dessus  le  monde:  et  il  parle  des  plus  ignorans.  Car  il  est  dit  de  tous  Chrestiens  par  le  Prophete  Isaie,  qu'ils  seront  tous  enseignez  de  Dieu.  Et  cest  enseignement-la,  n'emporte-il  pas  que  nous  ayons  la  foy  toute  conclue  et  arrestee,  et  que  nous  n'en  puissions  point  estre  divertis  ni  esbranlez?  Or  si  la  foy  d'une  personne  privee  doit  estre  victorieuse  par  dessus  tout  le  monde,  non  seulement  par  dessus  un  assaut,  ou  une  douzaine,  mais  que  le  diable  machinera  tout  ce  qui  luy  est  possible  pour  renverser  nostre  foy,  et  que  neantmoins  elle  demeure  invincible,  qu'elle  ait  une  constance  ferme,  et  non  variable,  que  sera-ce  de  ceux  qui  doyvent  conduire  les  autres,  et  qui  sont  comme  supposts  de  la  Chrestiente?  Et  ainsi  ce  n'est  point  sans  cause  que  S.  Paul  ne  se  contente  pas  que  nous  soyons  bien  fondez  en  la  verite  de  Dieu,  et  que  nous  l'appliquions  a  l'usage  et  profit  de  tout  le  peuple,  mais  il  veut  que  nous  demeurions  la  sans  flechir:  et  combien  que  les  vents,  les  tourbillons,  les  tempestes  s'esmeuvent,  que  nous  ne  chancellions  point,  mais  que  nous  tenions  tousiours  la  doctrine  ferme,  et  qu'on  ne  nous  la  puisse  arracher,  encore  qu'on  use  de  violence,  et  qu'on  nous  assaille  de  tous  costez,  que  iamais  ce  thresor-ci  ne  nous  soit  oste  que  nous