37:448  nec  destitit  alia  etiam  et  varia  sui  adventus  documenta  subinde  dare,  quibus  se  electo  populo  praesentem  ostendit,  atque  in  igne  venit  ad  iudicandos  hostes.  Tandem  scimus  eum  ultimo  venturum  in  igne  ut  omnes  impios  ulciscatur.  Sed  hic  locus  ad  extremum  iudicium  restringendus  non  est  quin  reliqua  etiam  complectamur.  Quanquam  has  minas,  ut  paulo  post  videbimus,  peculiariter  stringit  contra  larvatos  Iudaeos.  Metaphoricae  vero  hae  loquutiones  satis  usitatae  sunt  scripturis:  non  enim  aliter  horrendum  hoc  iudicium  Dei  animo  comprehendere  possemus  quam  si  prophetae  ex  rebus  notis  et  usitatis  similitudines  adferrent.  His  autem  sensus  nostros  serio  afficere  student  prophetae,  ut  vero  Dei  timore  perculsi  non  aemulemur  impios,  quibus  tam  horribilis  imminet  vindicta.  Unde  apparet  quam  frivolae  et  inutiles  sint  speculationes  sophistarum,  qui  de  qualitate  et  subtilitate  illius  ignis  disserunt,  quum  scriptura  eo  tendat,  ut  horribile  iudicium  Dei  nobis  sub  figuris  demonstret,  quod  alioqui  nec  cogitatione  complecti,  nec  animo  comprehendere  possemus.  Quod  etiam  melius  liquet  ex  nomine  gladii,  quia  eadem  est  ratio.  16.  (Quoniam  in  igne.)  Hic  nihil  adfert  novi:  sed  tantummodo  confirmat  superiorem  sententiam:  ac  formidolosum  hoc  iudicium  fore  demonstrat,  ne  quis  rem  levis  momenti  esse  putet.  Ilium  igitur  horrorem  amplificat  ut  metuant  impii,  pii  vero  se  puros  et  castos  conservent,  atque  ab  eorum  consortio  se  subducant  :  interea  aequo  animo  sustineant  iniustos  et  crudeles  hostium  impetus,  donec  armatus  prodeat  e  coelo  vindex.  Cladem  vero  denuntiat  cunctis  mortalibus,  ut  multa  sit  cadaverum  congeries.  Et  diserte  hoc  addidit,  quia  passim  regnaret  impietas,  ac  periculosam  tentationem  pii  ob  felicitatem  impiorum  sustinerent.  Nam  quae  ingenii  nostri  est  levitas,  prava  consuetudine  abduci  nos  sinimus,  et  multitudo  nos  conturbat,  ac  si  ad  prohibendam  Dei  manum  sufficeret.  Pravum  hunc  metum  corrigit  propheta:  quia  scilicet  quo  magis  grassabitur  impietas,  et  maior  sceleratorum  copia  futura  est,  eo  magis  accendetur  ira  Domini,  ut  plures  ac  maiores  strages  edat:  nec  impiorum  turba  et  conspiratio  impediet  quin  eodem  exitio  ipsos  tollat.  17.  (Qui  sanctificant.)  Nunc  hostes  illos  designat  quibus  Deum  infestum  fore  docuit.  Nam  dubium  esse  poterat,  exterosne  et  professos  hostes  notaret,  an  vero  sermonem  dirigeret  ad  Dei  contemptores,  qui  tamen  electis  et  sanctis  permixti  erant  :  aperte  ergo  falsos  et  degeneres  Iudaeos  compellat:  nec  mihi  dubium  est  quin  priore  loco  hypocritas  perstringat:  secundo  autem  ubi  dicit,  qui  comedunt  carnem  suillam,  sceleratos  designet:  hoc  est,  eos  qui  palam  et  crassiore  licentia  impii  erant.  Sanctificabant  se  hypocritae,  hoc  est,  falsas  sancti-